නේපාලයේ සුපිරි නිවසක සැඟවී සිටි ‘ගණේමුල්ලේ සංජීව’ ඝාතනයේ සුරූපී මෙහෙයුම්කාරිය කොටුකරගත් හැටි!

ගණේමුල්ලේ සංජීව ඝාතනයේ ප්‍රධාන සැලසුම්කාරිය ලෙස සැලකෙන, පාතාලයේ සුරූපී මෙහෙයුම්කාරිය වූ ඉෂාරා සෙව්වන්දි, නේපාලයේ බක්තපූර් දිස්ත්‍රික්කයේ සුඛෝපභෝගී නිවසක සැඟවී සිටියදී පෙරේදා (13) රාත්‍රියේදී අත්අඩංගුවට ගෙන ඇත. ඇය සමග තවත් පාතාල සාමාජිකයන් සිව් දෙනෙකු ද පොලිස් භාරයට ගැනුණි.පෑලියගොඩ අපරාධ කොට්ඨාසයේ අධ්‍යක්ෂ, සහකාර පොලිස් අධිකාරි රොහාන් ඕලුගල මහතා සහ අපරාධ පරීක්ෂණ දෙපාර්තමේන්තුවේ පොලිස් පරීක්ෂක ගිහාන් ද සිල්වා මහත්වරුන්ගේ දින තුනක විශේෂ මෙහෙයුමක ප්‍රතිඵලයක් ලෙස මෙම සාර්ථක අත්අඩංගුවට ගැනීම සිදුවිය. නේපාල පොලීසියේ සහ ජාත්‍යන්තර පොලීසියේ පූර්ණ සහාය ඇතිව මෙම මෙහෙයුම ක්‍රියාත්මක විය.කෙහෙල්බද්දර පද්මේගෙන් සිදුකළ ප්‍රශ්න කිරීම්වලින් ඉෂාරා සෙව්වන්දි සැඟවී සිටි ස්ථානය පිළිබඳ තොරතුරු තහවුරු කර ගැනීමෙන් පසු, ශ්‍රී ලංකා පොලිස් කණ්ඩායම කත්මන්දු නගරයට ගොස්, ඇය සැඟවී සිටි සුපිරි නිවසටම යාබද නිවසේ නවාතැන් ගනිමින් සිය විමර්ශන ආරම්භ කර ඇත. මෙහෙයුමේදී මුලින්ම අත්අඩංගුවට ගෙන ඇත්තේ ඉෂාරාගේ ප්‍රධාන සහායකයා වූ ‘ජේ.කේ. බායි’ නැමැත්තාය. ඔහුගෙන් කළ ප්‍රශ්න කිරීම්වලින් ඇය සිටි ස්ථානය නිශ්චිතව තහවුරු කරගත් පසු, නේපාල පොලීසියේ සහාය ද ඇතිව එම නිවස වටලා ඇයව අත්අඩංගුවට ගැනුණි.තමා අත්අඩංගුවට ගැනීමට පැමිණි සහකාර පොලිස් අධිකාරි රොහාන් ඕලුගල මහතා දුටු සැණින් තුෂ්නිම්භූත වූ ඉෂාරා සෙව්වන්දි “ඕලුගල සර්!” යැයි පවසා ඇති අතර, ඊට පිළිතුරු ලෙස ඕලුගල මහතා “ආ… කෙල්ලෙ කොහොමද?” යනුවෙන් විමසා ඇත. මාස හතක් තිස්සේ නේපාලයේ සිර වී සිටීමෙන් තමාට දැඩි අපහසුතා ඇති වූ බවත්, මෙසේ සිටිනවාට වඩා ලංකාවට යෑම සැපයක් යැයි සිතුණ ද, පොලිසියට හසු වේ යැයි බියෙන් නේපාලයේම රැඳී සිටි බවත් ඇය එහිදී ප්‍රකාශ කර තිබේ.විමර්ශනවලදී හෙළි වූයේ ජේ.කේ. බායි විසින් ඉෂාරා සෙව්වන්දිව බෝට්ටුවකින් ඉන්දියාවට රැගෙන ගොස්, සති දෙකක් එහි රඳවා තබාගෙන, පසුව දින හයක දුම්රිය ගමනකින් නේපාලයට ගෙනැවිත් ඇති බවය. නීති විරෝධී ලෙස අපරාධකරුවන් වෙනත් රටවලට පන්නා දැමීම සිය රැකියාව කරගත් ජේ.කේ. බායි, කත්මන්දු නුවරින් ඇයට කුලී නිවසක් ද ලබා දී ඇත.සංජීව ඝාතනයෙන් පසු දින කිහිපයක් කොළඹ අවට සැඟවී සිටි ඉෂාරා, පසුව මතුගම හා මිද්දෙණියට පලා ගොස් තිබේ. ජේ. කේ. බායි ඇය හා එක් වී ඇත්තේ මිද්දෙණියේදී වන අතර, එහිදී සම්පත් මනම්පේරි නමැති අපරාධකරුගේ සහාය ලැබුණේ ද යන්න ගැන පොලිසියට සැකයක් මතු වී ඇත.ප්‍රශ්න කිරීම්වලදී කෙහෙල්බද්දර පද්මේගේ කල්ලියට සම්බන්ධ තවත් අපරාධකරුවන් දෙදෙනෙකු සහ කාන්තාවක් පිළිබඳ තොරතුරු හෙළි විය. කත්මන්දු නගරයේ සැඟවී සිටි එම තිදෙනා ද අත්අඩංගුවට ගෙන තිබේ. එහිදී කල්ලියේ ප්‍රධානියකු වන ‘ගම්පහ බබා’ තමන්ව නිදහස් කිරීමට රුපියල් ලක්ෂ 50ක අල්ලසක් දීමට උත්සාහ කළ ද, ඕලුගල මහතා එය ප්‍රතික්ෂේප කර සියලු දෙනාම අත්අඩංගුවට ගත්තේය.අත්අඩංගුවට ගත් අනෙක් කාන්තාව චාවකච්චේරියේ පදිංචි තක්ෂි නැමැත්තියක් බවත්, ඇය ඉෂාරා සෙව්වන්දිගේ රූපයට බෙහෙවින් සමාන බවත් හඳුනාගෙන ඇත. මෙම දෙමළ කාන්තාවගේ දත්ත සහ ඡායාරූප යොදා ගනිමින් ඉෂාරා සෙව්වන්දි නමින් ව්‍යාජ විදේශ ගමන් බලපත්‍රයක් සකස් කර, ඒ ඔස්සේ ඇයව යුරෝපයට පන්නා යැවීමට සැලසුම් කර තිබූ බව ද හෙළි විය. පද්මේ ඇතුළු කල්ලිය ඉන්දුනීසියාවේදී අත්අඩංගුවට පත් වීමත් සමග එම සැලසුම් ව්‍යර්ථ වී ගොස් ඇත.අලුත්කඩේ අධිකරණයේදී ගණේමුල්ලේ සංජීව ඝාතනය කෙරුණේ කෙහෙල්බද්දර පද්මේගේ නියෝග මතය. හිටපු කොමාන්ඩෝ සෙබළෙකු වන කොමාන්ඩෝ සලිඳු නීතිඥවරයකු ලෙස වෙස් වලාගෙන වෙඩි තැබීම සිදු කළ අතර, ඉෂාරා සෙව්වන්දි ද නීතිඥවරියක ලෙස වෙස් වලාගෙන මෙහි මෙහෙයුම්කාරිය ලෙස කටයුතු කර තිබේ. ඝාතනයෙන් පසු කොමාන්ඩෝ සලිඳු පුත්තලමේදී පොලිසියට කොටු වුව ද, ඉෂාරා සෙව්වන්දි අත්අඩංගුවට ගැනීමට නොහැකි විය. මීට පෙර අවස්ථා කිහිපයකදීම සංජීව ඝාතනය කිරීමට ඇය සැලසුම් කර තිබූ බව ද අනාවරණය වී ඇත. අත්අඩංගුවට ගත් මෙම සැකකාරිය ඇතුළු පිරිස මේ වන විට නේපාල පොලීසිය භාරයේ රඳවා සිටී.