විදෙස් සංචාරක ආකර්ෂණය නොඅඩුව දිනාගත්, උඩරට දුම්රිය මාර්ගයේ පිහිටි ඓතිහාසික දෙමෝදර ආරුක්කු නවය පාලම සහ ඊට යාබද බිංගෙය, විදුලි බල්බවලින් ආලෝකවත් කිරීමට දුම්රිය දෙපාර්තමේන්තුව සහ මධ්යම සංස්කෘතික අරමුදල එක්ව පියවර ගෙන තිබෙනවා. මෙය, මෙරට සංචාරක කර්මාන්තයට නව ප්රබෝධයක් එක්කරනු ඇතැයි අපේක්ෂා කෙරේ.
මධ්යම සංස්කෘතික අරමුදලේ මාර්ගෝපදේශකත්වය යටතේ, ‘warm white’ පැහැයේ විදුලි බුබුලුවලින් ආරුක්කු නවය පාලම සහ බිංගෙය ආලෝකවත් කර ඇති බව දුම්රිය දෙපාර්තමේන්තුවේ අධිකාරී ඉංජිනේරු ධනුෂ්ක දිසානායක මහතා ප්රකාශ කළා.
බ්රිතාන්ය පාලන සමයේ ඉදිකරන ලද, වසර 104ක් පැරණි මෙම ආරුක්කු නවය පාලම සහ බිංගෙයෙහි කෞතුක වටිනාකම රැකෙන පරිදි තම අධීක්ෂණය යටතේ මෙම ව්යාපෘතිය සිදුකෙරෙන බව ඉංජිනේරු දිසානායක මහතා වැඩිදුරටත් සඳහන් කළා. දැනට ‘warm white’ පැහැයේ විදුලි බල්බ හැත්තෑවක් පමණ යොදාගෙන ආලෝකවත් කර ඇති අතර, ඊයේ (ජූලි 13) ඒ පිළිබඳව පෙරහුරුවක් ද පවත්වා තිබෙනවා.
මෙම ව්යාපෘතියේ සියලු කටයුතු අවසන් කර, ලබන අගෝස්තු මාසයේදී මෙය නිල වශයෙන් විවෘත කිරීමට නියමිතයි. මෙය දේශීය හා විදේශීය සංචාරකයින්ට රාත්රී කාලයේදීත් මෙම සුන්දර ස්ථානයේ අසිරිය විඳ ගැනීමට අවස්ථාවක් සලසා දෙනු ඇත.
