අම්බලන්ගොඩ භීතියට පත්කළ වෙඩි තැබීම! ‘කරන්දෙණිය සුද්දාගේ’ මස්සිනා ඝාතනය වෙයි!

අද (4) පෙරවරුවේ අම්බලන්ගොඩ නගරයම භීතියට පත් කරමින් සිදුවූ දරුණු වෙඩි තැබීමකින් දෙදරු පියෙකු ජීවිතක්ෂයට පත්ව තිබේ. අම්බලන්ගොඩ නගර සභා පුස්තකාලය ආසන්නයේදී, යතුරුපැදියකින් ගමන් කරමින් සිටි ධීවර ව්‍යාපාරිකයෙකු වන වරුසවිතාන මිරන්ත (55) මහතාට, මෝටර් රථයකින් පැමිණි නාඳුනන තුවක්කුකරුවන් පිරිසක් විසින් වෙඩි ප්‍රහාරයක් එල්ල කර පලාගොස් ඇති බව පොලිසිය වාර්තා කරයි. වෙඩි ප්‍රහාරයෙන් බරපතල තුවාල ලැබූ මිරන්ත මහතා බලපිටිය රෝහලට ඇතුළත් කිරීමෙන් අනතුරුව මියගොස් ඇති අතර, ඔහුගේ පපුවට වෙඩි උණ්ඩ තුනක් වැදී ඇති බව රෝහල් ආරංචි මාර්ග සඳහන් කළේය. සිද්ධිය වන අවස්ථාවේ ඔහු අසල බැංකුවක සිට අම්බලන්ගොඩ ධීවර වරාය බලා යමින් සිටි බවට තොරතුරු වාර්තා වේ. මියගිය මිරන්ත මහතා, අම්බලන්ගොඩ ධීවර වරායේ බහුදින ධීවර යාත්‍රා දෙකක හිමිකරුවෙකු වන අතර, දේශපාලනික වශයෙන්ද ක්‍රියාකාරී චරිතයක් වී තිබේ. ඔහු අම්බලන්ගොඩ මෝදර දේවාලයේ දේවාල කමිටුවේ සභාපතිවරයා ලෙසත්, අම්බලංගොඩ සමූපකාර මහා සභාවේ අධ්‍යක්ෂ මණ්ඩල සාමාජිකයෙකු ලෙසත් කටයුතු කර ඇත. කෙසේ වෙතත්, මෙම ඝාතනයට සම්බන්ධව සිදුකරන පොලිස් පරීක්ෂණවලදී ඉතා වැදගත් තොරතුරක් අනාවරණය වී තිබේ. ඒ, මියගිය මිරන්ත මහතා, විදේශගතව සිටින සංවිධානාත්මක අපරාධ කල්ලි නායකයෙකු ලෙස සැලකෙන ‘කරන්දෙණිය සුද්දා’ නොහොත් සොබනාහන්දි ජයලත් නැමැත්තාගේ වැඩිමහල් සොහොයුරියගේ ස්වාමිපුරුෂයා හෙවත් මස්සිනා වීමයි. වෙඩි තැබීම සඳහා පැමිණි සැකකරුවන් ගමන් කළ මෝටර් රථය පසුව කරන්දෙණිය, එගොඩවිල මංසන්ධියේ අතහැර දමා ගොස් තිබියදී පොලිසිය විසින් සොයාගෙන ඇත. 9mm වර්ගයේ ගිනි අවියක් මේ ඝාතනයට භාවිත කර ඇති බවටද තහවුරු වී තිබේ. මෙම ඝාතනය පිටුපස ඇති සැබෑ හේතුව කුමක්ද යන්න පිළිබඳව මේ වන විට දැඩි කතාබහක් නිර්මාණය වී ඇත.