පියුමි හංසමාලිගේ හෙන විතරක් නො ගහපු ජීවිතය සහ ‘Piumi Skin’ සාර්ථකත්වය!

පසුගියදා පැවති ඩිලානි අබේවර්ධනගේ උපන්දින සාදයට එක්වූ මේ දිනවල නිරන්තරයෙන් ආන්දෝලනාත්මක පුවත් මවන රූමතිය පියුමි හංසමාලි, එහිදී මාධ්‍යයට අලුත්ම තොරතුරු රැසක් හෙළි කළාය. ඇය ඩිලානි අබේවර්ධනට දක්වන්නේ දැඩි සෙනෙහසක් බවත්, ඇයගේ රසිකාවියක් බවත් පැවසූ පියුමි, ඩිලානි ඇමරිකාවේ සිටියදී පවා ඔවුන් පණිවිඩ මගින් සම්බන්ධව සිටි බවත්, මෙරටදී හමුවී වසර 5-6ක් පමණ වන බවත් සඳහන් කළාය. සාදයේදී ඇයගේ හැසිරීම පිළිබඳව නිවේදිකාව ප්‍රශ්න කළ විට, “අද ඩ්‍රන්ක් වෙලාත් නැතුව කෑ ගැහුවා. බලන්න ඇති එයාගේ හැටි” යැයි පියුමි කියා සිටියේ, එය ඇගේ සුපුරුදු ස්වභාවය බව හැඟවෙන අයුරිනි. තමන්ගේ වර්තමාන ජීවිතය ගැන විමසූ විට, “මේ දවස්වලදී අනේ… හෙන විතරයි මගේ දෙයියනේ ගහලා නැත්තේ. ඉන්නවා ඩාර්ලින්. ඉතින් මම සුපුරුදු මේ පියුමි හන්සමාලි. හිනා වෙලා සන්තෝසෙන් ඉන්නවා. ඉතින් ඔහේ යනවා. ජීවිතේ යනවා” යනුවෙන් ඇය පැවසුවේ, තමන් මුහුණ දුන් අභියෝග රාශියක් පිළිබඳව ඉඟි කරමිනි. තවද, ඇගේ “Piumi Skin” ව්‍යාපාරයේ සාර්ථකත්වය ගැනද ඇය අදහස් දැක්වූවාය. සමාජ මාධ්‍ය ඔස්සේ පෙරට වඩා ප්‍රසිද්ධ වීම නිසා, “Piumi Skin” නිෂ්පාදන සඳහා විශාල ඉල්ලුමක් ලැබෙන බවත්, තවත් ඇණවුම් ලබා දී තමන්ව දියුණු කරන ලෙසත් ඇය රසිකයන්ගෙන් ඉල්ලා සිටියාය. අභියෝග හමුවේ වුවද, වෙහෙස වී කීයක් හෝ උපයන සෑම කාන්තාවක්ම සමාජයේ කතා මැද වුවද දියුණු විය යුතු බවට පියුමි එහිදී ප්‍රබල පණිවිඩයක් ලබා දුන්නාය.