දැන් හැමෝම කතා කරන, ඔබේ පරිගණකයත් අනිවාර්යයෙන්ම සම්බන්ධ වන පුවතක් තමයි Microsoft ආයතනය Windows 10 මෙහෙයුම් පද්ධතියට ලබා දුන් නිල සහයෝගය ඊයේ (14) සිට සම්පූර්ණයෙන්ම අවසන් කිරීම. වසර 10කට ආසන්න කාලයක් අපේ පරිගණකවලට ජීවය දුන් Windows 10, අදින් පසු නොමිලේ කිසිදු Security, Feature හෝ Bug Fixes Update එකක් ලබා දෙන්නේ නැහැ. 💔
Forbes වෙබ් අඩවිය වාර්තා කරන්නේ ලෝකයේ ආයතන ගණනාවක පරිගණකවලින් 41%ක් තවමත් Windows 10 භාවිතා කරන බවයි. මේ තත්ත්වය නිසා අනාගතයේදී ඔවුන්ට විශාල ආරක්ෂක තර්ජනවලට මුහුණ දීමට සිදුවිය හැකි බවට අනතුරු අඟවා තිබෙනවා. ඇත්තටම මේක බරපතළ තත්ත්වයක් නේද?
ඒත් Microsoft ආයතනය Windows 10 භාවිතා කරන්නන් වෙනුවෙන් පොඩි අවස්ථාවක් ලබා දීලා තියනවා. ඒ තමයි Extended Security Update (ESU) පහසුකම. මේකෙන් අපිට තවත් වසරක කාලයක්, ඒ කියන්නේ 2026 ඔක්තෝබර් 13 වෙනිදා වෙනකම් ආරක්ෂක යාවත්කාලීන (Security Updates) ලබාගන්න පුළුවන්. හැබැයි මේක නොමිලේ නම් ලැබෙන්නේ නැහැ! ආසන්න වශයෙන් ඇමරිකානු ඩොලර් 30ක් (රුපියල් 9000/= පමණ) ගෙවලා තමයි මේ පහසුකම ලබාගන්න වෙන්නේ. ඒ වගේම මේකෙන් ලැබෙන්නේ ආරක්ෂක යාවත්කාලීන විතරයි, අලුත් Features නම් ලැබෙන්නේ නැහැ.
ඔබේ පරිගණකයට මේ ESU පහසුකම ලබාගන්න පුළුවන්ද කියලා දැනගන්න, Settings > Update & Security වෙත ගිහින් ‘Enroll Now’ කියන Option එක තියෙනවද කියලා බලන්න පුළුවන්. ඒත් ඔයාගේ Windows 10 එක Latest Update එකේ තියෙන්න ඕන වගේම, Crack හෝ Modified Version එකක් නම් මේ පහසුකම ලබාගන්න බැරිවෙයි.
කලබල වෙන්න එපා! අදින් පස්සේ ඔබේ Windows 10 පරිගණකය පාවිච්චි කරන්න බැරි වෙනවා කියන එක නෙවෙයි මේකේ තේරුම. අපි තවමත් Windows 7, 8 පාවිච්චි කරනවා වගේම, Windows 10ත් ඉදිරියට පාවිච්චි කරන්න පුළුවන්. හැබැයි කිසිම Update එකක් නැති නිසා Security Threats වලට තියෙන අවදානම වැඩි වෙනවා. අලුතින් එන Software ගොඩක් Windows 11 වලට විතරක් Support කරන්නත් ඉඩ තියෙනවා. ඒකට හොඳ Antivirus එකක් භාවිතා කරන එක හොඳම විසඳුමක් වෙන්න පුළුවන්.
