කෑගල්ල, ගලිගමුව ප්රදේශයේදී අද (ජූලි 21) අලුයම සිදු වූ දරුණු රිය අනතුරකින් මගීන් විසි හත් දෙනෙකු (27) තුවාල ලබා තිබෙනවා. මෙම අනතුර සිදුව ඇත්තේ ලංකා ගමනාගමන මණ්ඩලයට (ලංගම) අයත් බස් රථයක් සහ පෞද්ගලික බස් රථයක් මුහුණට මුහුණ ගැටීමෙන්.
පොලීසිය පවසන පරිදි, මෙම අනතුර අද අලුයම 5.00ට පමණ සිදුවී තිබෙනවා. වේරගොඩැල්ලේ සිට කෑගල්ල දෙසට ධාවනය වෙමින් තිබූ ලංගම බස් රථයක් සහ කෑගල්ලේ සිට රත්නපුරය බලා ගමන්ගත් පෞද්ගලික බස් රථයක් මෙලෙස අනතුරට ලක්වී ඇති බවයි වාර්තා වන්නේ.
අනතුරින් තුවාල ලැබූ මගීන් වහාම කෑගල්ල සහ වරකාපොළ රෝහල් වෙත ඇතුළත් කිරීමට පියවර ගෙන තිබෙනවා. රෝහල් ආරංචි මාර්ග සඳහන් කරන්නේ, තුවාල ලැබූවන් අතරින් දෙදෙනෙකුගේ තත්ත්වය බරපතල බවයි.
කොළඹ – නුවර ප්රධාන මාර්ගයේ, ගලිගමුව ප්රදේශයේදී සිදුවූ මෙම අනතුරට හේතුව මෙතෙක් නිශ්චිතව අනාවරණය වී නොමැත. කෙසේ වෙතත්, ගලිගමුව පොලීසිය සිද්ධිය සම්බන්ධයෙන් වැඩිදුර පරීක්ෂණ ආරම්භ කර තිබෙනවා.
