තම රෝගී තත්ත්වයක් සඳහා සිදුකිරීමට නියමිත සැත්කමක් වෙනුවෙන් කාන්තාවක් විසින් එකතු කරගෙන තිබූ රුපියල් ලක්ෂ 6කට අධික මුදලක්, විදෙස් මුදල් මෙන්ම රන් භාණ්ඩ තොගයක් එම නිවසේම පුද්ගලයෙකු විසින් සොරාගැනීමේ පුවතක් මට්ටක්කුලිය ප්රදේශයෙන් වාර්තා වේ.මෙම සොරකම සම්බන්ධයෙන් පොලීසිය විසින් අත්අඩංගුවට ගෙන ඇත්තේ නිවෙස්හිමි කාන්තාවගේ වැඩිමහල් සහෝදරියගේ පුත්රයාගේ බිරිඳ වීම විශේෂත්වයකි.
මට්ටක්කුලිය, කාක දූපත ප්රදේශයේ පදිංචි කාන්තාවක්, තම නිවසේ තිබූ රන් භාණ්ඩ සහ දෙස් විදෙස් මුදල් අස්ථාන ගතව ඇති බව පවසමින් මට්ටක්කුලිය පොලිසියට පැමිණිලි කර තිබුණි. මහල් දෙකකින් සමන්විත මෙම නිවසේ බිම් මහලේ කාමරයක අල්මාරියේ දමා තිබූ මුදල් සොරාගෙන ඇති බවටයි නිවෙස් හිමි කාන්තාව වැඩිදුරටත් සඳහන් කර ඇත්තේ.
ඒ අනුව, මට්ටක්කුලිය පොලිසියේ අපරාධ අංශයේ නිලධාරීන් පැමිණ නිවසේ සිදු කළ පරීක්ෂාවේදී, මුදල් තබා තිබූ අල්මාරියේ දොරගුලු ඇතුළත සිට කඩා ඇති ආකාරය පිළිබඳව සැක මතුවී ඇත. අදාළ දොරගුලු කඩා ඇත්තේ නිවස ඇතුළත සිටි අයෙකු විසින් බවට නිරීක්ෂණය වීමත් සමඟ, පොලීසිය නිවසේ අනෙකුත් කාමර ද සෝදිසියට ලක් කර තිබේ. එහිදී, නිවසේ උඩු මහලේ කාමරයක කාන්තා අත්බෑගයක දමා තිබියදී, සොරකම් කර සඟවා තිබූ අදාළ මුදල් සහ රන් භාණ්ඩ සොයාගෙන ඇත.
පොලීසිය සඳහන් කළේ, අදාළ සැකකාරිය සහ ඇගේ සැමියා වසර 14කට ආසන්න කාලයක් තිස්සේ එම නිවසේ පදිංචිව සිට ඇති බවයි.
මෙලෙස සොරාගෙන තිබූ මෙරට මුදල්වල වටිනාකම රුපියල් 655,000ක් වන අතර, සොරකම් කර තිබූ විදෙස් මුදල් අතර ඇමෙරිකානු ඩොලර් සියයේ නෝට්ටු 15ක් ඇතුළු විදෙස් මුදල් මෙන්ම රන් පවුම් 18ක් ද තිබූ බව පොලීසිය වැඩිදුරටත් සඳහන් කළේය
මට්ටක්කුලිය පොලීසිය සිද්ධිය සම්බන්ධයෙන් වැඩිදුර විමර්ශන පවත්වයි.
