ශ්‍රීමාලි ෆොන්සේකා CID හමුවේ: පාතාල සම්බන්ධතා සහ ඩුබායි රහස් ඇත්තද?

හිටපු විවාහක රූ රැජිනක මෙන්ම රංගන ශිල්පිනියක වන ශ්‍රීමාලි ෆොන්සේකා මහත්මියගෙන් අපරාධ පරීක්ෂණ දෙපාර්තමේන්තුව (CID) පසුගියදා ප්‍රකාශයක් සටහන් කරගෙන තිබේ. පාතාල සාමාජිකයෙකු ලෙස සැලකෙන ‘කෙහෙල්බද්දර පද්මේ’ නමැත්තාගේ ජංගම දුරකථනයෙන් හමුවූ ඡායාරූප කිහිපයක් සම්බන්ධයෙන් සිදුකෙරෙන විමර්ශනයකට අදාළව ඇයව මෙලෙස කැඳවා ඇත. ඇය CID වෙත පැමිණීමෙන් පසු මාධ්‍ය වෙත අදහස් දක්වමින් පැවසුවේ, 2022 වසරේ පැවති අවුරුදු උත්සවයකදී තමන් සමඟ ලබාගත් ඡායාරූපයක් සම්බන්ධයෙන් මෙම විමර්ශනය සිදු වූ බවයි. එම අවුරුදු උත්සවයට නළු නිළියන් ඇතුළු විශාල පිරිසක් සහභාගී වූ බවත්, තමන් සිය පවුලේ සාමාජිකයන් සමඟ පෞද්ගලික වියදමින් එහි ගිය බවත් ඇය අවධාරණය කළාය. ඡායාරූපයේ සිටි පුද්ගලයා කවුදැයි තමන් ඒ මොහොතේ දැන සිටියේ නැති බවද ඇය කියා සිටියාය. රට තුළ පැතිර යන මුදල් විශුද්ධිකරණ චෝදනා සම්බන්ධයෙන්ද ඇය පැහැදිලි කිරීමක් කළාය. තම ව්‍යාපාර නීති විරෝධී මුදල් හරහා ආරම්භ කළ බවට නැගෙන චෝදනා ප්‍රතික්ෂේප කළ ඇය, 2017 වසරේ සිට තමන් නීත්‍යානුකූලව ව්‍යාපාර කටයුතුවල නිරත වන බවත්, සියලු ගනුදෙනු CID වෙත පැහැදිලි කළ බවත් පැවසුවාය. නිතර ඩුබායි රාජ්‍යයට යන්නේ නීති විරෝධී පුද්ගලයන් හමුවීමට බවට නැගෙන චෝදනාද ඇය තරයේ ප්‍රතික්ෂේප කළාය. 2001 වසරේ සිට ඩුබායි වෙත ගමන් කරන, එහි අධ්‍යාපනය ලැබූ සහ නේවාසික වීසා පවා තිබූ තැනැත්තියක් ලෙස ඩුබායි යනු තම දෙවැනි නිවස බඳු බවත්, එහි ව්‍යාපාරයක් පවතින බවත් ඇය පෙන්වා දුන්නාය. තමන් නීතියට ගරු කරමින් ජීවත් වන අයෙකු බවත්, රටේ සිදුවන නීති විරෝධී දේ නැවැත්වීමට පූර්ණ සහයෝගය ලබා දෙන බවත් ශ්‍රීමාලි ෆොන්සේකා වැඩිදුරටත් සඳහන් කළාය. ඇය තම සගයන්ගෙන්ද ඉල්ලා සිටියේ, උත්සව සඳහා සහභාගී වීමේදී අනුග්‍රාහකයන් පිළිබඳව වඩාත් සැලකිලිමත් වන ලෙසයි.