ටොම් කෲස්ගේ ජීවිතයේ පළමු ඔස්කාර් සම්මානය!

හොලිවුඩයේ ජනප්‍රියතම චිත්‍රපට නළු ටොම් කෲස් සිය ජීවිතයේ පළමු ඔස්කාර් සම්මානයෙන් පිදුම් ලැබීමට පසුගියදා සමත් විය. 63 හැවිරිදි වියේ පසුවන ඔහුට මෙම ගෞරවනීය ඔස්කාර් සම්මානය හිමිවූයේ වාර්ෂික Governors Awards උළෙලේදීය. මෙම අවස්ථාවට ගායිකා ඩොලී පාර්ටන්, නර්තන ශිල්පිනී ඩෙබී ඇලන් සහ නිෂ්පාදන නිර්මාණ ශිල්පී වින් තෝමස් වැනි ප්‍රකට පුද්ගලයන්ද සහභාගී වූහ. “චිත්‍රපට නිර්මාණය කියන්නේ මම කරන දෙයක් නෙවෙයි, ඒක මම කවුද කියන එක” යැයි සිව් වතාවක් ඔස්කාර් සම්මානයට නිර්දේශ වූ කෲස්, සිය කතාවේදී පැවසීය. වසර 45ක සිය සිනමා දිවිය පුරා ඔහු සමඟ කටයුතු කළ සියලුම සිනමාකරුවන්ට ගෞරව දැක්වූ ඔහු, සිනමාවේ බලය පිළිබඳවද අදහස් දැක්වීය. ඔහු වේදිකාවට පැමිණි විට ස්ටීවන් ස්පිල්බර්ග්, ලියනාඩෝ ඩිකැප්‍රියෝ සහ ජෙරී බෲක්හයිමර් ඇතුළු බොහෝ සිනමා ප්‍රභූන් මිනිත්තු ගණනාවක් පුරා නැගී සිට අත්පොලසන් දුන්හ. “සිනමාව මාව ලොව වටා ගෙන යනවා. ඒක මට වෙනස්කම් අගය කරන්නත්, ගරු කරන්නත් උදව් කරනවා. ඒ වගේම අපේ පොදු මනුෂ්‍යත්වය, අපි කොතරම් සමානද කියන එකත් පෙන්නනවා. අපි කොහෙන් ආවත්, ඒ සිනමා ශාලාව තුළ අපි එකට හිනාවෙනවා, එකට දැනෙනවා, එකට බලාපොරොත්තු වෙනවා, එකට සිහින දකිනවා. ඒක තමයි මේ කලා ආකෘතියේ බලය” යනුවෙන් කෲස් සිය කතාවේදී වැඩිදුරටත් කියා සිටියේය. තම චිත්‍රපටවල භයානක දර්ශන පවා තමන් විසින්ම රඟපාන බවට ප්‍රසිද්ධියක් උසුලන කෲස්, ස්ට්‍රීමින් සහ සමාජ මාධ්‍ය සිනමාවට අභියෝග කරන මේ යුගයේදී සිනමාවේ දැඩි ආධාරකරුවෙකු ලෙසද කටයුතු කරයි. විශේෂයෙන්ම, ඩොනල්ඩ් ට්‍රම්ප් විසින් පිරිනැමීමට නියමිතව තිබූ Kennedy Center ගෞරව සම්මානයක් පවා ඔහු සිය කාර්යබහුලත්වය හේතුවෙන් ප්‍රතික්ෂේප කර තිබීම කැපී පෙනේ.