ලංකාවේ මාර්ගවල රථවාහන නීති කඩ කළාම, “මං අහවල් තැන වැඩ කරන්නේ, අහවලාගේ අහවලා” කියලා ෂේප් වෙන එක අලුත් දෙයක් නෙවෙයි. ඒත් දැන් එහෙම ලොකු කම් පෙන්නන්න ගියොත්, වීඩියෝ වෙලා සමාජ මාධ්‍ය පුරාම යන කාලයක්. ගම්පහින් වාර්තා වුණ මේ සිදුවීම ඒකට කදිම උදාහරණයක්. ගම්පහ – කොටුගොඩ මාර්ගයේ රාජකාරියේ යෙදී සිටි පොලිස් නිලධාරීන්, අන්තරාදායක ලෙස රිය ධාවනය කළ කාන්තාවකට වාහනය නවත්වන්න සංඥා කරලා තියෙනවා. ඒත් ඇය පොලිස් අණ නොතකා කිලෝමීටර් 15ක් විතර වේගයෙන් ගිහින්. අන්තිමට පොලිසියට සිද්ධ වෙලා තියෙන්නේ මිනුවන්ගොඩ, පොල්වත්ත හන්දිය වෙනකම් ලුහුබැඳ ගිහින් වාහනය නවත්වන්න. එතනදී තමයි කතාව තවත් රසවත් වෙන්නේ! රියදුරු බලපත්‍රය දෙන්නත් අකමැති වෙලා මේ කාන්තාව, තමන් ජ්‍යෙෂ්ඨ නියෝජ්‍ය පොලිස්පති රන්මල් කොඩිතුවක්කු මහතාගේ “නංගි” කියලා පොලිස් නිලධාරීන් බය කරන්න හදලා තියෙන්නේ. ඒ වෙලාවේ ඇය කලහකාරී විදිහට හැසිරෙන වීඩියෝ දර්ශනත් සමාජ මාධ්‍ය පුරාම පැතිර ගියා. පසුව ඇයව මිනුවන්ගොඩ පොලිසියේ කාන්තා නිලධාරිනියන්ගේ සහය ඇතුව අත්අඩංගුවට ගෙන තිබෙනවා. පොලිස් පරීක්ෂණවලින් පස්සේ හෙළි වෙලා තියෙන්නේ, කොළඹ ලිපින දෙකක පදිංචි, 46 හැවිරිදි එම්.ඒ.එම්. රොෂානි පෙරේරා හෙවත් මීරියම් රොෂානි භූතානි කියන මේ ව්‍යාපාරික කාන්තාව ජ්‍යෙෂ්ඨ නියෝජ්‍ය පොලිස්පතිවරයාගේ කිසිම ඥාතියෙක් හෝ හිතවතෙක් නෙවෙයි කියලා. රන්මල් කොඩිතුවක්කු මහතාත් මේක තහවුරු කරලා. නඩුව ගම්පහ ප්‍රධාන මහේස්ත්‍රාත් සීලණි පෙරේරා මහත්මිය ඉදිරියේ කැඳෙව්වාම, පොලිසිය කිව්වේ භයානක රිය පැදවීම, පොලිස් අණ නොතැකීම, බලහත්කාරකම් කිරීම, ව්‍යාජ ලෙස පෙනී සිටීම සහ රාජකාරියට බාධා කිරීම වගේ බරපතල චෝදනා ඇයට එල්ල වෙලා තියෙනවා කියලා. ඒ වගේම රියදුරු බලපත්‍ර දෙකක් සහ පදිංචි ස්ථාන දෙකක් ගැනත් පරීක්ෂණ කරන්න ඕන කියලා පොලිසිය සඳහන් කළා. ඇයගේ නීතිඥයා ඇප ඉල්ලුවත්, අධිකරණය කිව්වේ වීඩියෝ දර්ශන අනුව ඇයගේ හැසිරීම විශ්වාස කරන්න බැහැ, ඇප දුන්නොත් අධිකරණයෙන් පැනලා යන්න පුළුවන් කියලා. ඒ අනුව ඇයව නොවැම්බර් 10 වෙනිදා දක්වා රක්ෂිත බන්ධනාගාරගත කරන්න නියෝග කළා. මේ සිදුවීම පිටුපස, ජ්‍යෙෂ්ඨ නියෝජ්‍ය පොලිස්පති රන්මල් කොඩිතුවක්කු මහතාව අපහසුතාවයට පත් කරන්න පොලිසියේම කවුරු හරි අදිසි හස්තයක් ක්‍රියාත්මක වුණාද කියන සැකයකුත් දැන් පොලිස් මූලස්ථානයෙන් මතුවෙලා තියෙනවා. මේ ගැනත් වැඩිදුර පරීක්ෂණ සිදුවෙනවා.
