ෆෝන් එකේ කතා කර කර බස් පැදවූ රියදුරුටයි, ටිකට් නොදී සල්ලි වංචා කළ කොන්දොස්තරටයි වුණු දේ!

බස්නාහිර පළාත් මාර්ගස්ථ මගී ප්‍රවාහන අධිකාරියෙන් දැඩි පියවරක් ගෙන තිබෙනවා. ඒ, ජංගම දුරකථනයෙන් කතා කරමින් නොසැලකිලිමත් ලෙස රිය පැදවූ බස් රථ රියදුරෙකුට සහ මගීන්ට ප්‍රවේශ පත්‍ර නොදී ගාස්තු වංචා කළ කොන්දොස්තරවරයෙකුට එරෙහිවයි. කිරිබත්ගොඩ සිට අඟුලාන දක්වා ධාවනය වන 154 මාර්ගයේ සේවය කළ මෙම රියදුරුගේ සේවය දින 7කට තහනම් කර ඇති අතර, ඔහු රියදුරු පුහුණු වැඩමුළුවකටද යොමු කර තිබෙනවා. මීට අමතරව, රුපියල් 2500ක සේවා ගාස්තුවක්ද ඔහුගෙන් අය කරගෙන ඇත. මෙම සිදුවීම වාර්තා වන්නේ පසුගිය 09 වන දින බෞද්ධාලෝක මාවත ඔස්සේ ධාවනය වෙමින් තිබූ බස් රථයකදීයි. එහි ගමන් ගත් මගියෙකු විසින් රියදුරු ජංගම දුරකථනයෙන් කතා කරමින් අපරීක්ෂාකාරී ලෙස රිය පදවන ආකාරය වීඩියෝ ගත කර තිබෙනවා. මෙම මගියා බස්නාහිර පළාත් මාර්ගස්ථ මගී ප්‍රවාහන අධිකාරියට ලිඛිත පැමිණිල්ලක් ඉදිරිපත් කර ඇති අතර, එහිදී කොන්දොස්තරවරයා රුපියල් 74ක් වූ ගමන් ගාස්තුවට නිසි ප්‍රවේශ පත්‍රය නිකුත් නොකළ බවත්, රුපියල් 80න් ඉතිරි රුපියල් 06 ආපසු නොදුන් බවත් චෝදනා කර තිබේ. අධිකාරියේ පැමිණිලි අංශය භාර කළමනාකාරිනී තේජා ජයසුන්දර මහත්මියගේ මගපෙන්වීම යටතේ සිදුකළ පරීක්ෂණයකින් අනතුරුව රියදුරු සහ කොන්දොස්තරවරයා වරදකරුවන් බවට තහවුරු විය. කොන්දොස්තරවරයාගේ සේවය එක් දිනකට අත්හිටුවා, රුපියල් 750ක සේවා ගාස්තුවක් අය කර සංස්කරණ පුහුණුවකට යොමු කර තිබෙනවා. බස්නාහිර පළාත් මාර්ගස්ථ මගී ප්‍රවාහන අධිකාරියේ සභාපති විශ්‍රාමික කොමදෝරු ගාමිණී ජාසිංහ මහතා අවධාරණය කරන්නේ මගී ආරක්ෂාව සහ විනය පවත්වාගෙන යාම සඳහා මෙවැනි දැඩි පියවර අත්‍යවශ්‍ය බවයි.