මියන්මාරයේ “සයිබර් අපරාධ කලාපයේ” සිරවූ ලාංකික සිහින!

මියන්මාරයේ තායිලන්ත දේශසීමාව ආසන්නයේ පිහිටි භයානක ප්‍රදේශයක් ගූගල් සිතියමේ පවා “සයිබර් අපරාධ කලාපය” ලෙස නම් කර තිබීම බොහෝ දෙනාගේ අවධානයට ලක්ව තිබෙනවා. මියාවෙඩ්ඩි නගරයේ සිට කිලෝමීටර් 25ක් පමණ දුරින් පිහිටි මෙම ප්‍රදේශය සම්පූර්ණයෙන්ම ත්‍රස්ත කණ්ඩායමක පාලනය යටතේ පවතින බව වාර්තා වීමත් සමඟ එහි භයානක බව තවත් වැඩි වී තිබේ. මෙවැනි අඳුරු පසුබිමක් සහිත ප්‍රදේශයකට තමයි, පරිගණක ක්ෂේත්‍රයේ රැකියා සිහින දකිමින් සංචාරක වීසා මත විදේශගත වූ අහිංසක ශ්‍රී ලාංකික තරුණ තරුණියන් පිරිසක් රැවටී ගොස් ඇත්තේ. මීට පෙරද, එම ප්‍රදේශයේම සයිබර් අපරාධ සඳහා යොදවා සිටි තවත් ශ්‍රී ලාංකිකයන් පිරිසක් දැඩි පරිශ්‍රමයක් යොදා බේරා ගැනීමට හැකි වූ බවට තොරතුරු පළ විය. ව්‍යාජ රැකියා පොරොන්දු වලට රැවටී, තම ජීවිතය පවා අවදානමට ලක් කරමින්, මෙවැනි භයානක කලාපවලට ගොස් සිරවන ලාංකිකයන්ගේ සංඛ්‍යාව දිනෙන් දින ඉහළ යමින් පවතින බවයි වාර්තා වන්නේ. මේ පිළිබඳව වැඩි අවධානයක් යොමු කිරීම ඉතා වැදගත් වන අතර, විදේශ රැකියා සොයන තරුණ තරුණියන් මෙවැනි වංචනික ක්‍රියාවලින් ආරක්ෂා කර ගැනීමට කඩිනම් පියවර ගත යුතුව ඇත.