හිටපු රාජ්‍ය අමාත්‍ය සහ මහනුවර දිස්ත්‍රික් පාර්ලිමේන්තු මන්ත්‍රී ලොහාන් රත්වත්තේ මහතා අභාවප්‍රාප්ත වී තිබේ. මියයන විට ඒ මහතා 57 වන වියේ පසුවිය.
පසුගිය කාලය පුරාවට පැවති අසනීප තත්ත්වයක් හේතුවෙන්, කොළඹ පෞද්ගලික රෝහලක ප්‍රතිකාර ලබමින් සිටියදී ඒ මහතා මෙලෙස ජීවිතක්ෂයට පත්ව ඇති බව පවුලේ ආරංචි මාර්ග තහවුරු කළේය.
දිවංගත අනුරුද්ධ රත්වත්තේ මහතාගේ පුත්‍රයෙකු වන ලොහාන් රත්වත්තේ මහතා, ශ්‍රී ලංකා දේශපාලනයේ දීර්ඝ කාලයක් පුරා ක්‍රියාකාරීව නිරත වූ චරිතයකි. ඔහු, මැණික් හා ස්වර්ණාභරණ ආශ්‍රිත කර්මාන්ත රාජ්‍ය අමාත්‍යවරයා සහ බන්ධනාගාර කළමනාකරණ හා සිරකරුවන් පුනරුත්ථාපන කටයුතු රාජ්‍ය අමාත්‍යවරයා ඇතුළු තනතුරු කිහිපයක්ම හොබවා ඇත.
දේහය පිළිබඳ අවසන් කටයුතු පසුව දැනුම් දෙන බව පවුලේ ප්‍රකාශකයෙකු සඳහන් කළේය.
