කලවාන – රද්දැල්ල ගඟට පැන සියදිවි නසා ගැනීමට උත්සාහ කළ 16 හැවිරිදි පාසල් සිසුවියක් ප්රදේශවාසීන්ගේ මැදිහත්වීමෙන් බේරාගෙන තිබෙනවා. මෙම දැරිය මෙවර සාමාන්ය පෙළ විභාගයට මුහුණ දී ප්රතිඵල ලැබූ කලවාන, වැද්දාගල ප්රදේශයේ පදිංචිකාරියක් ය.
සිසුවිය විභාගය අසමත් වීම හේතුවෙන් ඇති වූ දැඩි මානසික පීඩනය හේතුවෙන් මෙම තීරණය ගැනීමට උත්සාහ කර ඇති බවට මූලික තොරතුරු අනාවරණය වී තිබෙනවා.
කෙසේ වෙතත්, මෙම සිදුවීම සම්බන්ධයෙන් දැරියගේ දෙමාපියන් කලවාන පොලිසියට පැමිණිලි කර ඇත්තේ, කිසියම් තරුණයින් පිරිසක් විසින් සිය දියණියව ත්රිරෝද රථයකින් පැහැරගෙන ගොස් ගඟට තල්ලු කර දැමූ බවටයි.
පොලිසිය ආරක්ෂිත කැමරා දර්ශන ද උපයෝගී කරගනිමින් මේ පිළිබඳව විමර්ශන ආරම්භ කර තිබෙනවා. ප්රදේශවාසීන් විසින් දැරිය ගඟෙන් බේරාගෙන කලවාන පොලිසියට භාරදීමෙන් අනතුරුව සිදුකළ ප්රශ්න කිරීම් වල දී දැරිය විසින් ප්රකාශ කර ඇත්තේ, මෙවැනි තීරණයක් ගැනීමට හේතුව සාමාන්ය පෙළ විභාගය අසමත් වීමෙන් ඇති වූ මානසික පීඩනය බවයි.
දැරිය වැඩිදුර ප්රතිකාර සහ මානසික උපදේශන සඳහා රත්නපුර ශික්ෂණ රෝහල වෙත මාරු කර යවා තිබෙනවා. මේ සිදුවීම, අධ්යාපනික ප්රතිඵල හේතුවෙන් දරුවන් මුහුණ දෙන මානසික පීඩනය පිළිබඳව සමාජයේ අවධානය යොමු කළ යුතු බවට නැවත වරක් සිහිගන්වනවා.
