රාගම බටුවත්ත ප්‍රදේශයේදී ‘ආමි උපුල්’ නමැත්තා වෙඩි තබා ඝාතනය කිරීමේ සිද්ධිය සම්බන්ධයෙන් තවත් සැකකරුවෙක් අත්අඩංගුවට ගෙන තිබෙනවා. මෙම අපරාධයට ආධාර අනුබල ලබාදීම සම්බන්ධයෙනුයි 30 හැවිරිදි මෙම සැකකරු අත්අඩංගුවට ගෙන ඇත්තේ.
කැලණිය කොට්ඨාස අපරාධ විමර්ශන කාර්යාංශය මගින් අත්අඩංගුවට ගත් මෙම සැකකරු සන්තකයේ තිබී මත්ද්‍රව්‍ය ග්‍රෑම් 50.6ක් ද සොයා ගැනීමට හැකිව තිබෙනවා. අත්අඩංගුවට ගත් සැකකරු රාගම බටුවත්ත ප්‍රදේශයේම පදිංචිකරුවෙක්.
පසුගිය ජූලි 03 වැනිදා රාත්‍රියේ ත්‍රිරෝද රථයකින් පැමිණි අයෙකු ‘ආමි උපුල්’ නමැත්තාට වෙඩි තබා පළාගොස් තිබුණා. මෙම සිද්ධියට සම්බන්ධයෙන් තවත් සැකකරුවන් දෙදෙනෙකු පසුගිය ජූලි 08 වැනිදා අත්අඩංගුවට ගැනීමට පොලිසිය සමත් වුණා.
‘ආමි උපුල්’ ඝාතන සිද්ධිය සම්බන්ධයෙන් වැඩිදුර විමර්ශන මේ වන විටත් ක්‍රියාත්මකයි.
