අත්හැර දමා ගිය අභිරහස් ‘Mary Celeste’ නෞකාවේ සත්‍ය කතාව!

1872 දෙසැම්බර් 4 වැනිදා, බ්‍රිතාන්‍ය-ඇමරිකානු ‘Mary Celeste’ නෞකාව අත්ලාන්තික් සාගරයේ අතරමං වී තිබියදී සොයා ගැනුණේ කිසිවෙකුත් නැති හිස් නෞකාවක් ලෙසයි. පුදුමයට කරුණ නම්, නෞකාව මුහුදේ ගමන් කිරීමට සුදුසු තත්ත්වයේ තිබූ අතර, එහි තිබූ සියලු භාණ්ඩද එලෙසින්ම නොවෙනස්ව තිබීමයි. එකම අඩුව වූයේ ජීවිතාරක්ෂක බෝට්ටුවක් පමණයි. එයද පිළිවෙළකට ගොඩබස්වා ඇති බවට සාක්ෂි තිබුණා. එසේනම් මෙහි සිටි අයට කුමක් සිදුවන්නට ඇත්ද? බොහෝ අභිරහස් මුහුදු සිදුවීම් මෙන්, මෙහි සත්‍යයද අපට කිසිදා දැනගැනීමට නොලැබෙනු ඇත, මන්ද නෞකාවේ සිටි කිසිවෙකු ගැන නැවත කිසිදා අසන්නට නොලැබුණු බැවිනි. 1872 නොවැම්බර් මාසයේදී ‘Mary Celeste’ නෞකාව නිව්යෝර්ක් සිට ඉතාලියේ ජෙනෝවා බලා යාත්‍රා කිරීම ආරම්භ කළා. කපිතාන් බෙන්ජමින් බ්‍රිග්ස් සහ ඔහුගේ කාර්ය මණ්ඩලයේ සාමාජිකයන් හත් දෙනෙකුගෙන් යුක්ත වූ මෙම නෞකාවේ, බ්‍රිග්ස්ගේ බිරිඳ සහ ඔවුන්ගේ දෙහැවිරිදි දියණියද ගමන් කළා. නෞකාවේ ප්‍රමාණවත් තරම් සැපයුම් තිබූ අතර, මැහුම් මැෂිමක් සහ පියානෝවක් වැනි සුඛෝපභෝගී භාණ්ඩ පවා එහි තිබුණා. විශේෂඥයන් එකඟ වන්නේ, මුහුදු ගමන් සුදුසු නෞකාවක් අත්හැර දැමීමට නම්, අසාමාන්‍ය හා භයානක යමක් සිදුවිය යුතු බවයි. එහෙත්, නෞකාවේ දිනපොතේ අවසාන සටහනෙහි අසාමාන්‍ය කිසිවක් සඳහන්ව නොතිබුණි. නෞකාව ඇතුළත සියල්ලම පිළිවෙළකට තිබුණා. වසර ගණනාවක් පුරා, කැරැල්ලක්, මුහුදු කොල්ලකරුවන්ගේ ප්‍රහාරයක් හෝ යෝධ බූවල්ලෙකුගේ හෝ මුහුදු රාක්ෂයෙකුගේ ප්‍රහාරයක් වැනි න්‍යායන් මේ සම්බන්ධයෙන් ඉදිරිපත් වුණා. මෑත වසරවලදී, විද්‍යාඥයන් නව න්‍යායක් යෝජනා කර තිබෙනවා. ඒ අනුව, නෞකාවේ තිබූ මත්පැන් වාෂ්ප වීමෙන් පිපිරීමක් සිදුවී ඇති අතර, එය විද්‍යාත්මක අසාමාන්‍යතාවයක් හේතුවෙන් කිසිදු පිළිස්සුම් සලකුණක් ඉතිරි කර නොමැති වුවද, කපිතාන් බ්‍රිග්ස්ට සියලු දෙනා ජීවිතාරක්ෂක බෝට්ටුවට නංවන තරමට එය භයානක වී ඇති බවයි. කෙසේ වෙතත්, ‘Mary Celeste’ හි අභිරහස තවමත් මුහුදේ ගැඹුරේ සැඟවී පවතිනවා.