මේ දිනවල ඇමරිකාවේ කොලරාඩෝ ප්රාන්තයේ සිටින මිනිසුන් මහත් කලබලයකට පත්ව ඇත්තේ, සාමාන්ය හාවුන්ගේ පෙනුම වෙනස් කරමින්, ඔවුන්ගේ හිසෙන් සහ මුහුණෙන් අමුතු අං සහ මස් දඬු වැනි දේ මතුවීම නිසා. මේ නිසාම ඔවුන්ට “zombie rabbits” (සොම්බි හාවෝ) කියන නම පටබැඳිලා. මේ භයානක පෙනුම නිසා සමාජ මාධ්යවලත් මේ ගැන විශාල කතාබහක් ඇතිවෙලා තියෙනවා
ඇමරිකානු වනජීවී විශේෂඥයන් පවසන්නේ මේ අමුතු පෙනුමට හේතුව “Shope papillomavirus” කියන වෛරසයක් බවයි. මේක විශේෂයෙන්ම හාවන්ට පමණක් බලපාන වෛරසයක්. කෘමීන් දෂ්ට කිරීමෙන් (උදා: මදුරුවන්, කිනිතුල්ලන්) මේ වෛරසය හාවන් අතර පැතිරෙනවා.
වෛරසය ආසාදනය වූ හාවුන්ගේ සම මත විශාල ඉන්නන් වැනි ගැටිති හටගන්නවා. මේවා විශේෂයෙන්ම හිස සහ මුහුණ ප්රදේශයේ දක්නට ලැබෙනවා. මේ ගැටිති විශාලව වැඩෙන විට අං හෝ නපුරු පෙනුමක් ඇති මස් දඬු වගේ පෙනුමක් ඇතිවෙනවා
වනජීවී විශේෂඥයන් පවසන්නේ මෙය මිනිසුන්ට හෝ වෙනත් සුරතල් සතුන්ට බෝ නොවන වෛරසයක් බවයි. ඒ නිසා බියක් ඇති කරගත යුතු නැහැ. නමුත් මේ හාවුන් ස්පර්ශ කිරීමෙන් වළකින ලෙස ඔවුන් උපදෙස් දෙනවා.
සාමාන්යයෙන් මේ වෛරසය හාවුන්ට දරුණු ලෙස හානි කරන්නේ නැහැ. බොහෝ හාවුන්ගේ ප්රතිශක්තිකරණ පද්ධතියට මේ වෛරසය පරාජය කරන්න පුළුවන්.ඒ වගේම කාලයක් යන විට මේ ගැටිති ඉබේම නැතිවී යනවා. නමුත් සමහර හාවුන්ගේ ඇස්, කට ආදිය ආසන්නයේ මේ ගැටිති හටගත්තොත් ඔවුන්ට ආහාර ගැනීමට හෝ දැකීමට අපහසු වෙන්න පුළුවන්. ඒ වගේ අවස්ථාවලදී ඔවුන් මිය යන්නටත් ඉඩ තිබෙනවා.
වෛරසය ආසාදනය වූ හාවුන්ගේ මේ අමුතු පෙනුම “jackalope” කියන පුරාවෘත්තයේ එන අං සහිත හාවාගේ කතාවටත් පාදක වුණා කියලා විද්යාඥයන් විශ්වාස කරනවා. ඒ පුරාවෘත්තයත් ඇමරිකාවේ ජනප්රියයි.
ඒ නිසා, මේ “සොම්බි හාවන්” කියන එක ඇත්තටම සොම්බිලා නෙවෙයි. මේක සොබාදහමේ තවත් අමුතු පැත්තක් විතරයි. නමුත් ඒ පෙනුම ඇත්තටම භයානකයි කියන එක නම් බොරුවක් නෙවෙයි
