ලොව පුරා ජනප්රිය සන්නිවේදන යෙදුමක් වන WhatsApp, සිය ඇන්ඩ්රොයිඩ් (Android) භාවිතා කරන්නන් සඳහා පෞද්ගලිකත්ව ආරක්ෂාව ඉහළ නංවන නව විශේෂාංගයක් හඳුන්වා දීමට සූදානම් වේ. ‘Username keys’ ලෙස නම් කර ඇති මෙම නව ක්රමවේදය මගින් පරිශීලකයින්ට තම දුරකථන අංකය හෙළි නොකර, ආගන්තුකයන්ගෙන් ලැබෙන අනවශ්ය පණිවිඩ පාලනය කිරීමට වැඩි හැකියාවක් ලැබෙනු ඇත. මීට සමගාමීව, MetaAI සමඟ තත්ය කාලීන හඬ සංවාද පැවැත්වීමේ විශේෂාංගය iOS යෙදුම සඳහා ද පුළුල් කිරීමට සමාගම කටයුතු කරමින් සිටී.
WhatsApp හි නව විශේෂාංග පිළිබඳ තොරතුරු වාර්තා කරන WABetaInfo වෙබ් අඩවියට අනුව, මෙම ‘Username keys’ විශේෂාංගය කොටස් දෙකකින් සමන්විත වේ.
- දුරකථන අංකය වෙනුවට ‘Username’ (පරිශීලක නාමය)
මෙම නව ක්රමවේදය යටතේ, පරිශීලකයින්ට තම දුරකථන අංකය හෙළි නොකර, අලුතින් යමෙකු සම්බන්ධ කර ගැනීමට අවශ්ය වූ විට තම ‘පරිශීලක නාමය’ (Username) පමණක් බෙදාහදා ගැනීමට අවස්ථාව ලැබේ. මේ හරහා ඔබගේ ගිණුම බෙදාගැනීමේදී දුරකථන අංකය ලබා දීමේ අවශ්යතාවය ඉවත් වේ. මෙය Telegram වැනි යෙදුම්වල දැනටමත් පවතින ක්රමවේදයකට සමාන වන අතර, එමගින් පරිශීලක පෞද්ගලිකත්වය ඉහළ මට්ටමකින් සුරක්ෂිත වේ. - අමතර ආරක්ෂාවට ‘Username Key’ (පරිශීලක නාම යතුර)
මෙහි දෙවන සහ වඩාත්ම වැදගත් කොටස වන්නේ ‘Username Key’ හෙවත් ‘පරිශීලක නාම යතුර’ යි. මෙය ඉලක්කම් හතරකින් (4−digit) යුත් රහස්ය PIN අංකයකි.
මෙම ක්රමවේදය සක්රීය කළ විට, යමෙකුට ඔබගේ පරිශීලක නාමය තිබුණද, පළමු වරට ඔබට පණිවිඩයක් එවීමට නම්, ඔවුන් ඔබගේ පරිශීලක නාමය සහ මෙම ඉලක්කම් හතරේ යතුර යන දෙකම දැන සිටිය යුතුය. මෙම යතුර නොමැති පුද්ගලයින්ට, ඔබගේ පරිශීලක නාමය දැන සිටියද, ඔබව සම්බන්ධ කර ගැනීමට නොහැකි වනු ඇත.
කෙසේ වෙතත්, මෙම විශේෂාංගය ඔබගේ දුරකථන අංකය දන්නා පුද්ගලයින්ට හෝ ඔබ දැනටමත් සංවාද පවත්වන සම්බන්ධතා සඳහා බල නොපානු ඇත. WABetaInfo වෙබ් අඩවියට අනුව, මෙම විශේෂාංගය WhatsApp බීටා (Android 2.25.22.9) සංස්කරණයේ දක්නට ලැබී ඇති අතර, එය තවමත් සංවර්ධන මට්ටමේ පවතින බැවින් බීටා පරීක්ෂකයින්ට පවා තවමත් භාවිතයට ගෙන නොමැත.
මීට අමතරව, WABetaInfo වාර්තා කරන පරිදි, WhatsApp විසින් සිය MetaAI සමඟ තත්ය කාලීන හඬ සංවාද පැවැත්වීමේ විශේෂාංගය iOS භාවිතා කරන්නන් සඳහා ද පුළුල් කරමින් සිටී. කෘත්රිම බුද්ධිය (AI) මත පදනම් වූ මෙම චැට්බොට් සමඟ සෘජුවම හඬින් සංවාද කිරීමට මෙමගින් පරිශීලකයින්ට ඉඩ සැලසේ.
මෙම පහසුකම මීට පෙර Android යෙදුම සඳහා දක්නට ලැබුණු අතර, දැන් WhatsApp බීටා (iOS 25.21.10.76) සංස්කරණයේ ද එය නිරීක්ෂණය වී ඇත. ඒ අනුව, ඉදිරි සති කිහිපය තුළ මෙම විශේෂාංගය සියලුම iOS භාවිතා කරන්නන් වෙත නිකුත් කිරීමට ඉඩ ඇති බවට අපේක්ෂා කෙරේ.
