සජිත්ගේ අම්මා නිවසක් ඉල්ලුවාද? සමාජ මාධ්‍ය කැළඹූ ලිපියේ ඇත්ත කතාව!

පසුගිය දින කිහිපය පුරා සමාජ මාධ්‍ය ජාලා ඔස්සේ වේගයෙන් පැතිර ගිය ලිපියක් හේතුවෙන් විශාල ආන්දෝලනයක් ඇති විය. එහි සඳහන් වූයේ විපක්ෂ නායක සජිත් ප්‍රේමදාස මහතාගේ මව වන, හිටපු ජනාධිපති ආර්යා හේමා ප්‍රේමදාස මහත්මිය කොළඹ අවටින් නිවසක් ඉල්ලා රජයට ලිපියක් යොමු කර ඇති බවයි. මෙම පුවත බොහෝ දෙනා අතර කතාබහට ලක්වූ අතර, සත්‍ය වශයෙන්ම එවැනි ලිපියක් යොමු කර තිබේද යන්න පිළිබඳව විපක්ෂ නායක මාධ්‍ය ඒකකයෙන් විමසීමක් කර ඇත. එහිදී ඔවුන් පැහැදිලිවම සඳහන් කර ඇත්තේ, හේමා ප්‍රේමදාස මහත්මිය එවැනි කිසිදු ලිපියක් රජයට යොමු කර නොමැති බවයි. සමාජ මාධ්‍ය ඔස්සේ සංසරණය වන ලිපිය ව්‍යාජ ලෙස සකස් කරන ලද අසත්‍ය ලේඛනයක් බවත්, එය ජනතාව නොමඟ යැවීම සඳහා හිතාමතාම සමාජ මාධ්‍යට මුදා හැර ඇති බවත් විපක්ෂ නායක මාධ්‍ය ඒකකය වැඩිදුරටත් අවධාරණය කරයි. තවදුරටත් තොරතුරු අනාවරණය කරමින් ඔවුන් පවසා ඇත්තේ, හිටපු ජනාධිපති ආර්යාවට හිමිව තිබූ නිල නිවස 2023 වසරේදී යළි රජයට භාර දුන් බවයි. හේමා ප්‍රේමදාස මහත්මිය දැනට කොළඹ පිහිටි ඇයගේ පෞද්ගලික නිවසේ ජීවත් වන අතර, ඇයට හිමිව තිබූ නිල නිවසේ කිසිදාක පදිංචිව නොසිටි බවද ඔවුන් පෙන්වා දෙයි. මෙවැනි ව්‍යාජ ලිපි සකස් කර අසත්‍ය තොරතුරු සමාජගත කිරීම මගින් විපක්ෂ නායකවරයාට මඩ ප්‍රහාරයක් එල්ල කිරීමට උත්සාහ දරා ඇති බවද මාධ්‍ය ඒකකය පවසයි.