නිල නිවසින් යන්න චන්ද්‍රිකා මාස 2ක් ඉල්ලයි

හිටපු ජනාධිපතිනිය චන්ද්‍රිකා බණ්ඩාරනායක කුමාරතුංග මහත්මියට සිය නිල නිවෙසින් මාස දෙකක් ඇතුළත ඉවත් වීමට සිදුවන බවට වාර්තා වේ. නව පනත් කෙටුම්පතක් සම්මත වීමත් සමඟ මෙම තත්ත්වය උද්ගත වී ඇති අතර, 1994 සිට 2005 දක්වා මෙරට පාලනය කළ ඇය, ඬේලි මිරර් පුවත්පතට අදහස් දක්වමින් මේ බව තහවුරු කර තිබේ. තමන් දැනටමත් කොළඹ නව නිවෙසක් සොයාගෙන ඇති බවත්, එහි අලුත්වැඩියා කටයුතු කඩිනමින් සිදුවෙමින් පවතින බවත් ඇය පවසයි. සාමාන්‍යයෙන් රජයේ නිවෙසකින් ඉවත් වීමට මාස තුනක දැනුම්දීමක් ලැබුණද, තමන්ට එවැනි දැනුම්දීමක් නොලැබුණු බවත්, අලුත්වැඩියා කටයුතු නිමවූ වහාම මාස දෙකකටත් අඩු කාලයකින් නිල නිවෙසින් පිටව යන බවත් ඇය අවධාරණය කරයි. මීට සති තුනකට පෙර සිදුවූ හදිසි අනතුරකින් තමන්ගේ උකුල් අස්ථිය බිඳී ගොස් සැත්කමකට ලක්වූ බවත්, මේ වන විට සුවය ලබමින් සිටින බවත් හිටපු ජනාධිපතිනිය සඳහන් කළාය. මේ හේතුවෙන් නිවෙසේ උඩුමහලට සහ යටිමහලට යෑම පවා තමන්ට අපහසු බව ඇය පෙන්වා දෙයි. මේ තත්ත්වය යටතේ, තමන්ට ජීවිතාන්තය දක්වා නිල නිවෙසේ රැඳී සිටීමට අවසර ඉල්ලා ජනාධිපති අනුර කුමාර දිසානායක මහතාට ලිපියක් යොමු කළ බවත්, එම ඉල්ලීම ප්‍රතික්ෂේප වූ බවත් ඇය හෙළි කළාය. වසර 15ක් ඇතුළත පිළිකා රෝගී තත්ත්වයන් දෙකකින් දිවි ගලවාගත් තමන්ට, මහලු වියේදී නිවෙසින් ඉවත් වීම අපහසු බවත්, නිවෙසේ අලුත්වැඩියා සඳහා රුපියල් මිලියන 14ක් තම අතින් ගෙවූ බවත්, තමන් නිල නිවසට පැමිණෙන විට තිබුණේ බොරලු පමණක් බවත්, තණකොළ සිටුවා භූමි අලංකරණය කළේ තම වියදමින් බවත් ඇය වැඩිදුරටත් කියා සිටියාය. වර්තමාන රජය හිටපු ජනාධිපතිවරුන් සම්බන්ධයෙන් විමර්ශන පැවැත්වුවද, එම ලැයිස්තුවේ තමන් නොමැති බවද ඇය අවධාරණය කළාය. අනුර කුමාර දිසානායක මහතා මැතිවරණ වේදිකාවලදී දූෂණය ගැන පමණක් කතා කළා මිස, රටේ ප්‍රශ්න විසඳන ආකාරය හෝ රට දියුණු කරන ආකාරය ගැන වචනයක්වත් කීවේ නැති බවට චෝදනා කළ චන්ද්‍රිකා මහත්මිය, ඔවුන්ට තවමත් තමන්ගේ ආණ්ඩුවේ දූෂණ වළක්වා ගන්නේ කෙසේදැයි අවබෝධයක් නොමැති බවත්, ඔවුන්ගේ එකම සටන් පාඨය වූයේ හිටපු ජනාධිපතිවරුන් නිල නිවෙස්වලින් පන්නා දැමීම බවත් සැර බසින් කියා සිටියාය.