ප්‍රසිද්ධ හාස්‍ය නළු උපාලි කීර්තිසේන අතුරුදහන් වූ අභිරහස!

ශ්‍රී ලාංකීය සිනමාවේ සහ ටෙලිනාට්‍ය කලාවේ වැජඹුණු, උපාලි කීර්තිසේන නම් වූ කලාකරුවා අදටත් අප අතර නැත්තේ ඇයි? ඔහුගේ අතුරුදහන් වීම පිටුපස සැඟවුණු අභිරහස කුමක්ද? 1965 ජූනි මස 18 වන දින මෙලොව එළිය දුටු උපාලි, තමන්ගේම වූ සුවිශේෂී රංගන විලාසයකින් ප්‍රේක්ෂක හදවත් දිනාගත් අයෙකි. ඔහු වේදිකාවේදී මෙන්ම තිරය මතද ප්‍රේක්ෂකයන් හිනැස්සූ චරිතයක් වූ නමුත්, ඔහුගේ සැබෑ ජීවිතය නිමාවන්නේ කිසිවකුටත් සිතාගත නොහැකි ඛේදනීය අයුරිනි. 2016 වසරේ පෙබරවාරි මාසයේදී ජා ඇල ප්‍රදේශයේ මිතුරකුගේ සැලොන් එකකට ගිය උපාලි, එදිනෙන් පසු නැවත නිවසට පැමිණියේ නැත. ඔහු ලක්ෂ ගණනක් වටිනා රන් ආභරණ පැළඳ සිටි බවටද පවුලේ සාමාජිකයන් ප්‍රකාශ කර තිබුණි. දින කිහිපයකට පසු පවුලේ අය පොලිසියට පැමිණිල්ලක් කළ අතර, සතියකට පමණ පසු ජා ඇල කුණු ගොඩක් අසලින් කාන්තාවකට කුණු ගෝනියක බහා තිබූ සිරුරක් හමු විය. එය දැඩි ලෙස විකෘති වී තිබූ බැවින් හඳුනාගැනීමට අපහසු තත්ත්වයක පැවතුණි. පොලිසිය උපාලිගේ පවුලට සිරුර හඳුනාගැනීම සඳහා පැමිණෙන ලෙස දැනුම් දුන්නද, පසුව ඔවුන්ට දන්වා ඇත්තේ පැමිණීම අවශ්‍ය නොවන බවත්, එම සිරුර අතුරුදහන් වී ඇති බවත්ය! මෙම කම්පන සහගත සිදුවීම උපාලිගේ සහෝදරිය පුවත්පතකට පවසා තිබුණි. කුණු ගොඩකින් හමුවූ සිරුරක් මෙලෙස අතුරුදහන් වූයේ කෙසේද යන්න අදටත් අභිරහසකි. එම සිරුර උපාලි අවසන් වරට සිටි සැලොන් එකට කිලෝමීටරයක් පමණ දුරින් හමුවී තිබීමද සැකයක් උපදවයි. සැලොන් හිමිකරු ප්‍රධාන සැකකරු ලෙස නම් කෙරුණද, සාක්ෂි නොමැතිවීම හේතුවෙන් ඔහු නිදහස් විය. වසර 5කට අධික කාලයක් ගතවී ඇතත්, උපාලි කීර්තිසේනට සිදුවූයේ කුමක්ද යන්න හෝ ඔහු ජීවතුන් අතර සිටින්නේද යන්න පිළිබඳව කිසිදු තොරතුරක් මෙතෙක් සොයාගෙන නොමැත. පවුලේ අය එම සිරුර උපාලිගේ බව පිළිගැනීමට අකමැති බැවින්, ඔහු තවමත් අතුරුදහන් වූවන්ගේ ලැයිස්තුවේ සිටී. මේ කතාව පිටුපස ඇති සත්‍යය කවදා හෝ එළියට ඒවිද?