කොළඹ නගරයේ ප්රමුඛ පෙළේ පාසලක් ආශ්රිතව වාර්තා වන බිහිසුණු සිදුවීමක් මේ වන විට රටම කම්පා කරවමින් සිටී. 2025 ඔක්තෝබර් 4 වන දින, නවවන ශ්රේණියේ අධ්යාපනය ලබන වයස අවුරුදු 14ක් වූ සිසුන් තිදෙනෙකු පාසල තුළදීම ලිංගික අපයෝජනයකට ලක්ව ඇති බවට තොරතුරු අනාවරණය වී තිබේ.
මෙම අපයෝජනය සිදුකර ඇත්තේ පාසලේ ආරක්ෂක අංශයේ සේවය කළ ‘සිරක්මා’ නැමැති පුද්ගලයෙකු බවට චෝදනා එල්ල වේ. සිද්ධිය සම්බන්ධයෙන් වඩාත් කම්පන සහගත කරුණ වන්නේ, පාසලේ විදුහල්පති ගේ භාරකාරත්වය යටතේ සිසුන් පාසල තුළ රඳවාගෙන සිටියදී මෙවැනි අපරාධයක් සිදුවීමයි. විදුහල්පතිවරයා මීට පෙර පළාත් අධ්යක්ෂක සැලසුම් නියෝජ්ය පළාත් අධ්යක්ෂකවරයෙකු ලෙස කටයුතු කළ අයෙකු බවද සඳහන් වේ.
සිද්ධිය වූ දින සිට මේ දක්වා, එනම් 2025 ඔක්තෝබර් 21 වන දින දක්වාත්, සිසුන් අපයෝජනයට ලක්කළ බවට චෝදනා ලබන ආරක්ෂක නිලධාරියා පලාගොස් ඇති අතර, කිසිදු පරීක්ෂණයක් ආරම්භ වී නොමැති බවට United Human Rights ආයතනය චෝදනා කරයි.
අපයෝජනයට ලක්වූ එක් සිසුවෙකුගේ මව මහනාම විදුහලේ ගුරුවරියක් වීමද විශේෂත්වයකි. සිසුන්ගේ දෙමාපියන් මේ පිළිබඳව කොල්ලුපිටිය පොලිසියට සහ ජාතික ළමා ආරක්ෂක අධිකාරියට දැනටමත් පැමිණිලි කර ඇති අතර, 119 හදිසි ඇමතුම් අංකයට සහ කාන්තා පොලිස් කාර්යාංශයටද පැමිණිලි දෙකක් ලැබී ඇත.
එසේ තිබියදීත්, අදාළ රාජ්ය ආයතන මේ සම්බන්ධයෙන් නිහඬව සිටීම දැඩි ප්රශ්නයක් වී තිබේ.
විදුහල්පතිවරයා සිද්ධිය යටගැසීමට උත්සාහ කළ බවටද බරපතළ චෝදනා එල්ල වේ. මේ පිළිබඳව ප්රශ්න කළ ගුරුවරියන් දෙදෙනෙකුට තර්ජනය කර ඔවුන්ගේ WhatsApp පණිවිඩ පවා මකා දමා ඇති බවට තොරතුරු අනාවරණය වී ඇත. දෙමාපියන් මේ වන විට දැඩි බියකින්, ලැජ්ජාවකින් සහ පසුතැවීමකින් පසුවන අතර, තම දරුවන්ගේ මානසික තත්ත්වය පිළිබඳව දැඩි ලෙස කම්පා වී සිටී.
United Human Rights ආයතනය ඉල්ලා සිටින්නේ, වහාම මෙම සිසුන් වෛද්ය පරීක්ෂණ සඳහා යොමු කරන ලෙසත්, අපරාධයට සම්බන්ධ සියලු දෙනාට එරෙහිව නීතිය ක්රියාත්මක කරන ලෙසත්, විශේෂයෙන්ම විදුහල්පතිවරයා අත්අඩංගුවට ගෙන වගකීම භාරගන්නා ලෙසත්ය.
පාසල තුළ සිදුවූ මෙම අපරාධය සම්බන්ධයෙන් විදුහල්පතිවරයා දැනුවත් බවට දැඩි සැකයක් පවතින අතර, මේ සියලු දෙනාම අපයෝජකයන්ට අනුබල දෙන බවට චෝදනා එල්ල වේ. මෙම සිද්ධිය තවදුරටත් යටගැසීමට ඉඩ දුනහොත් රටේ අනාගතය භයානක තත්ත්වයකට පත්විය හැකි බවද ඔවුහු අවධාරණය කරති.
