නුවරඑළියේ භින්නෝන්මාද රෝගී පුතාට වෛද්‍ය වාර්තාවකින් අසාධාරණයක්? පියාගෙන් මානව හිමිකම් කොමිසමට පැමිණිල්ලක්!

නුවරඑළියේ පියෙක් සිය භින්නෝන්මාද රෝගී පුත්‍රයාට අසාධාරණයක් සිදුවූ බව පවසමින් ශ්‍රී ලංකා මානව හිමිකම් කොමිෂන් සභාවට පැමිණිල්ලක් ඉදිරිපත් කර තිබේ. සිවිල් ආරවුලක් මුල් කරගනිමින්, නිසි පරීක්ෂාවකින් තොරව නිකුත් කළ වැරදි වෛද්‍ය වාර්තාවක් මත තම පුත්‍රයාව අංගොඩ මානසික සෞඛ්‍ය විද්‍යායතනය වෙත යොමු කිරීමට කටයුතු කර ඇති බවට ඔහු චෝදනා කරයි. මෙම මතභේදාත්මක වෛද්‍ය වාර්තාව නිකුත් කර ඇත්තේ නුවරඑළිය මහ රෝහලේ මානසික වාට්ටුවේ කාර්ය මණ්ඩලය සමඟ ඇති වූ සිදුවීමකින් පසුව, එම වාට්ටුව භාර විශේෂඥ මනෝ වෛද්‍යවරයා විසිනි. පියා පවසන්නේ මෙයින් තම පුතුගේ මානව හිමිකම් උල්ලංඝනය වී ඇති බවයි. පසුගිය සැප්තැම්බර් 30 වන දින රෝහලේ මානසික සෞඛ්‍ය සායනයෙන් ප්‍රතිකාර ලබන මෙම තරුණයා, වාට්ටුවේ සේවය කළ හෙද නිලධාරිනියක පිළිබඳව විමසීමේදී රෝහල් කාර්ය මණ්ඩලය විසින් ඔහු පසුපස පන්නා ගොස් පහර දීමට උත්සාහ කර ඇති බව පැමිණිල්ලේ සඳහන් වේ. මෙම සිදුවීමෙන් පසු ඔක්තෝබර් 02 වන දින නුවරඑළිය පොලිසියේ නිලධාරීන් විසින් තම පුත්‍රයාව නිවසේදී අත්අඩංගුවට ගෙන ඇත. විශේෂඥ වෛද්‍යවරයාගේ වාර්තාව මත ඔහුව අධිකරණයට ඉදිරිපත් කර බදුල්ල සහ වැලිකඩ බන්ධනාගාර හරහා අංගොඩ රෝහලට යොමු කරන බව පොලිසිය දැනුම් දී තිබේ. කාර්ය මණ්ඩලය සහ රෝගියා අතර වූ ආරවුලේදී, එම කාර්ය මණ්ඩලයේම කොටස්කරුවෙකු වන විශේෂඥ වෛද්‍යවරයා ඒකපාර්ශ්විකව ක්‍රියා කරමින් තම පුත්‍රයා වැරදිකරු බවට පත්කිරීමට උත්සාහ කර ඇති බවට පියා චෝදනා කරයි. මේ සම්බන්ධයෙන් ඔහු ශ්‍රී ලංකා වෛද්‍ය සභාවට සහ සෞඛ්‍ය අමාත්‍ය නලින්ද ජයතිස්ස මහතාටද පැමිණිලි ඉදිරිපත් කර ඇත. ලෝක මානසික සෞඛ්‍ය දිනය සැමරීමට ආසන්නව ඇති මොහොතක, බලධාරීන් මැදිහත්වී මෙම අසාධාරණයට කඩිනම් යුක්තියක් ඉටුකරනු ඇතැයි තමන් අපේක්ෂා කරන බවද ඔහු වැඩිදුරටත් කියා සිටියේය.