පොතුහැර ප්‍රදේශයෙන් වාර්තා වන සංවේදී පුවතක් මේ වන විට රට පුරා කතාබහට ලක්ව තිබෙනවා. විශ්‍රාමික උප පොලිස් පරීක්ෂකවරයෙකු වූ මාරබැද්දේ රත්නායක මුදියාන්සේලාගේ ඉන්ද්‍රපාල මහතාට (62) අත්වූ හිතාගන්නටත් බැරි ඛේදනීය ඉරණම නිසා ඔහුගේ පවුලේ සාමාජිකයන් මෙන්ම ප්‍රදේශවාසීන්ද දැඩි කම්පනයට පත්ව සිටිනවා.මහනුවර සිට කොළඹට දුම්රියෙන් ගොස් ආපසු පැමිණෙමින් සිටි ඉන්ද්‍රපාල මහතාට පොතුහැර දුම්රිය ස්ථානයේදී සිදුවූ මෙම අනතුර පිළිබඳව ඔහුගේ බිරිඳ වන එච්.එම්. මාලනී හේරත් මහත්මිය හදිසි මරණ පරීක්ෂණයේදී සාක්ෂි දෙමින් කියා සිටියේ මෙවන් කතාවක්. “සැමියා සාමාන්‍යයෙන් හවස මහව දුම්රියෙන් ඇවිත් රෑ හත වෙනකොට ගෙදරට එනවා. එදත් ඒ දුම්රියෙන්ම එනවා කියලා තමයි ගියේ. ඒත් එදා දුම්රියේදී එයාට නින්ද ගිහින් තිබිලා. ඇහැරෙනකොට දුම්රිය පොතුහැර දුම්රිය ස්ථානයේ නවත්වලා නැවතත් ගමන ආරම්භ කරලා. ඒ නිසා කලබල වෙලා දුවන දුම්රියෙන් බහින්න ගිහින් තමයි මේ අනතුර වෙලා තියෙන්නේ.”මෙම අනතුරින් ඉන්ද්‍රපාල මහතාගේ දෙපා සම්පූර්ණයෙන්ම වෙන්වී බරපතළ තුවාල සිදුව තිබූ අතර, වහාම කුරුණෑගල ශික්ෂණ රෝහලට ඇතුළත් කළත් ඒ වන විටත් ඔහු මියගොස් සිටි බවට වාර්තා වනවා. පශ්චාත් මරණ පරීක්ෂණයේදී හෙළිවී ඇත්තේ බරපතළ තුවාල හේතුවෙන් ඇතිවූ රක්ත කම්පන තත්ත්වයකින් මරණය සිදුව ඇති බවයි. ගෝනහේන විශේෂ කාර්ය බළකා කඳවුරේ සේවය කර විශ්‍රාම ගොස් සිටි ඉන්ද්‍රපාල මහතා යටිහේන ගමේ කා අතරත් ජනප්‍රිය චරිතයක් වූ අතර, දෙදරු පියෙකු වූ ඔහුගේ අකල් මරණයෙන් මුළු ප්‍රදේශයම ශෝකයට පත්ව තිබෙනවා.
