ඇල්ල අනතුරේ අභිරහස් ජීප් රථයේ කැමරා දර්ශන අධිකරණයෙන් ඉල්ලයි!

ඇල්ල, රාවණා ඇල්ල ප්‍රදේශයේදී පුද්ගලයන් 16 දෙනෙකුට මරු කැඳවූ ඛේදනීය බස් රථ අනතුර සම්බන්ධයෙන් මේ වන විට නවතම තොරතුරු රැසක් අනාවරණය වී තිබෙනවා. පසුගිය ඔක්තෝබර් 04 වන දා රාත්‍රියේ තංගල්ල නගර සභාවේ සේවක පිරිසක් රැගෙන යමින් තිබූ මෙම බස් රථය, ඇල්ල – වැල්ලවාය මාර්ගයේ 24 වන කණුව අසලදී මීටර් 350ක පමණ ප්‍රපාතයකට පෙරළී ගියේ රටම කම්පාවට පත් කරමින්. අවාසනාවන්ත ලෙස බස් රථයේ රියදුරු සහ නගර සභා ලේකම්වරයාද ඇතුළුව 16 දෙනෙකුට දිවි අහිමි වුණා. මෙම මහා ඛේදවාචකයට හේතුව කුමක්දැයි සොයා බැලීමේදී, අනතුරට මොහොතකට පෙර බස් රථය සුඛෝභෝගී ජීප් රථයක ගැටී ඇති බවට තොරතුරු ලැබුණා. එම ජීප් රථයේ සවිකර තිබූ ඩෑෂ් කැමරා දර්ශන අනතුර පිළිබඳ තීරණාත්මක සාක්ෂි සපයන බවට විශ්වාස කෙරුණත්, එම දර්ශන ලබා දීම අභිරහස් ලෙස ප්‍රමාද වීම පොලිසියට හිසරදයක් වුණා. තාක්ෂණික අපහසුතා මුවාවෙන් ජීප් රථයේ රියදුරු සහ අයිතිකරු දර්ශන ලබා දීමෙන් වැළකී සිටීම හේතුවෙන්, අවසානයේදී ඇල්ල පොලිසියට අධිකරණ නියෝගයක් ලබා ගැනීමට සිදු වුණා. මේ අතර, මෝටර් රථ ප්‍රවාහන දෙපාර්තමේන්තුව විසින් පත් කළ විශේෂඥ පරීක්ෂක කණ්ඩායම සිය මූලික විමර්ශන වාර්තාව සකස් කරමින් සිටිනවා. ඔවුන්ගේ මූලික නිගමන අනුව, බස් රථය පල්ලම් බැසීමේදී වැඩි 04 ගියරය භාවිත කරමින් අතිශය අනාරක්ෂිතව ධාවනය වී ඇති බවත්, තිරිංග මත පමණට වඩා යැපීම නිසා පිටුපස දකුණු පස තිරිංග පද්ධතිය අධික ලෙස රත් වී අක්‍රිය වීමත් අනතුරට ආසන්නතම හේතුව වී ඇති බවත් සඳහන්. මෙම වාර්තාව ලබන සතියේදී ප්‍රවාහන අමාත්‍යවරයාට භාර දීමට නියමිත අතර, එහි සම්පූර්ණ විස්තර අනාවරණය වීමත් සමඟ ඇල්ල අනතුරේ සත්‍ය කතාව රටට හෙළිවනු ඇතැයි අපේක්ෂා කෙරෙනවා.