කටුනායක ගුවන්තොටුපොළේදී අත්අඩංගුවට ගත් සර්ප ජාවාරම්කාරියගේ කතාව!

කටුනායක ජාත්‍යන්තර ගුවන්තොටුපොළේදී පසුගිය සැප්තැම්බර් 11 වන දින රාත්‍රියේදී කාන්තාවක් සර්පයන් හය දෙනෙකු නීති විරෝධී ලෙස මෙරටට ගෙන ඒමට තැත් කිරීමේදී රේගු අත්අඩංගුවට පත්ව තිබේ. වනජීවී සහ වෘක්ෂලතා ආඥා පනත මෙන්ම CITES සම්මුතියේ වගන්ති ද උල්ලංඝනය කරමින් සිදුකළ මෙම ජාවාරම පිළිබඳව බුද්ධි තොරතුරක් මත රේගු මත්ද්‍රව්‍ය පාලන අංශයේ සහ ජෛව විවිධත්ව, සංස්කෘතික සහ ජාතික උරුමයන් ආරක්ෂණ අංශයේ නිලධාරීන් විසින් මෙහෙයුම දියත් කර ඇත.කොළඹ, කෙසෙල්වත්ත ප්‍රදේශයේ පදිංචි 40 හැවිරිදි ව්‍යාපාරික කාන්තාවක් වන ඇය, මෙම සර්පයන් තායිලන්තයේ බැංකොක් නගරයෙන් මිලදී ගෙන, ඉන්දියාවේ චෙන්නායි වෙත පැමිණ, එතැන් සිට ඉන්ඩිගෝ ගුවන් සේවයේ ගුවන් යානයකින් කටුනායකට පැමිණ තිබේ. ඇය ‘කිසිවක් ප්‍රකාශ කිරීමට නොමැති’ හරිත මාවත ඔස්සේ ගුවන් තොටුපොළෙන් පිටව යාමට උත්සාහ කර ඇති බව රේගු නිලධාරීන් සඳහන් කළේය. ඉතා සූක්ෂම ලෙස ඇයගේ ගමන් මලු දෙකක් තුළ සඟවා තිබූ මෙම සර්පයන් අතරට කහ ඇනකොන්ඩා (Yellow Anaconda), බෝල් පයිතන් (Ball Python), ස්පෙකල්ඩ් කින්ග් ස්නේක් (Speckled King Snake) සහ හොන්ඩියුරානු කිරි සර්පයා (Honduran Milk Snake) යන දුර්ලභ වර්ග ද ඇතුළත් විය.මෙම සර්පයන් මෙරට අලෙවි කිරීමේ අරමුණින් ගෙනැවිත් ඇති බවට පොලිසිය සැක පළ කරන අතර, ඒවා නිසි පරිදි අලෙවි නොවුණහොත් මෙරට වනාන්තරවලට මුදාහැරීමේ බරපතළ අවදානමක් පවතින බවත්, එය මෙරට පරිසර පද්ධතියට විශාල බලපෑමක් එල්ල කරන බවත් රේගු නිලධාරීන් අනතුරු ඇඟවීය. ගුවන් යානයක් තුළ මෙවැනි ජීවී සතුන් රැගෙන ඒම නීති විරෝධී මෙන්ම අතිශය අනතුරුදායක ක්‍රියාවක් බව ද ඔවුන් අවධාරණය කළේය. සිද්ධිය සම්බන්ධයෙන් ඉන්ඩිගෝ ගුවන් සේවයේ නිලධාරීන් රේගු පරිශ්‍රය වෙත කැඳවා දැඩි ලෙස අවවාද කර ඇති අතර, විමර්ශන අවසන් වූ පසු මෙම සර්පයන් ආපසු ඔවුන්ගේ රටට රැගෙන යන ලෙස ද නියෝග කර ඇත.මේ වනවිට ශ්‍රී ලංකාව තුළ විශාල වශයෙන් ගෘහාශ්‍රිතව සර්පයන් ඇති කිරීමේ ප්‍රවණතාවක් පවතින බවත්, ඔවුන්ගේ ආහාර සඳහා සුදු පැහැති කුඩා මීයන් විශේෂයක් ද විශාල වශයෙන් ආනයනය කරමින් පවතින බවත් රේගු නිලධාරීන් වැඩිදුරටත් අනාවරණය කරගෙන තිබේ.