ඉංගිරිය ඛේදවාචකය! වියපත් කාන්තාවන් ඉලක්ක කළ මිනීමරුවා

ඉංගිරිය, ඌරුගල ප්‍රදේශයේදී 74 හැවිරිදි වියපත් කාන්තාවක් දූෂණය කර ඝාතනය කිරීමේ සිද්ධියට අදාළව අත්අඩංගුවට ගත් සැකකරුවෙකු ලබන 24 වැනිදා දක්වා රක්ෂිත බන්ධනාගාරගත කිරීමට හොරණ මහේස්ත්‍රාත් අධිකරණය නියෝග කර ඇත. මෙම සැකකරු 56 හැවිරිදි තිදරු පියෙකි. මියගිය කාන්තාවගේ පුත්‍රයා විසින් පසුගිය 21 වැනිදා ඉංගිරිය පොලිසියට කරන ලද පැමිණිල්ලකින් පසුව පොලිස් විමර්ශන ආරම්භ විය. මුලින් සාමාන්‍ය මරණයක් ලෙස පෙනුනද, පසුව එය ඝාතනයක් බවට අනාවරණය විය. ඝාතකයා පිළිබඳව කිසිදු තොරතුරක් නොතිබූ අතර, එම ප්‍රදේශයේම තවත් 84 හැවිරිදි වියපත් කාන්තාවකට ලිංගික අතවරයකට තැත් කර දේපළ කොල්ලකෑමක් පිළිබඳව ලැබුණු පැමිණිල්ලකින් පසුව මෙම සැකකරු අත්අඩංගුවට ගැනීමට පොලිසියට හැකි විය. පොලිස් විමර්ශනවලදී අනාවරණය වූයේ, සැකකරුගේ පියා ඔහු කුඩා කල අත්හැර ගොස් ඇති බවත්, මව විසින් ඔහුව අසීරු ලෙස හදා වඩා ගෙන ඇති බවත්ය. ඔහුගේ ළමා වියේදී අසල්වැසි වියපත් කාන්තාවන් කිහිප දෙනෙකුගෙන් ලැබුණු ආදරය හා රැකවරණය හේතුවෙන්, තරුණ වියට පත්වීමත් සමඟ එම කාන්තාවන් කෙරෙහි ඔහුට ලිංගික ආශාවක් ඇති වී ඇති බවට පොලිසිය තොරතුරු අනාවරණය කරගෙන තිබේ. සැකකරුගේ ප්‍රකාශ අනුව, පළමුව ඝාතනයට ලක් වූ කාන්තාව විරෝධය දැක්වීම හේතුවෙන්, කොට්ටයක් මුඛයට තබා මරා දමා පලා ගොස් ඇත. පසුගිය 30 වැනිදා රාත්‍රියේ විදුලිය විසන්ධි කර 84 හැවිරිදි කාන්තාවගේ නිවසට ඇතුළු වී අතවර කිරීමට උත්සාහ කර ඇති නමුත්, ඇය උඩුමහලට ගොස් සැඟවීමෙන් දිවි බේරාගෙන තිබේ. ඇය පලා ගොස් ඇති බව සිතූ සැකකරු නිවසේ තිබූ භාණ්ඩ කිහිපයක් රැගෙන පලා ගොස් ඇත. රූපවාහිනී යන්ත්‍රයක් විකිණීමට රැගෙන යන බවට ලැබුණු තොරතුරක් මත මෙම සැකකරු අත්අඩංගුවට ගැනීමෙන් පසුව මෙම සියලු අපරාධ පිළිබඳ තොරතුරු අනාවරණය වී ඇත.