දෙහිවල නගර සභා බල ප්රදේශයේ පසුගිය ජූලි 18 වන දා රාත්රියේ සිදුකළ හදිසි ආහාර වැටලීමකදී, මහජන පරිභෝජනයට නුසුදුසු ආහාර පිළියෙළ කිරීම සහ අලෙවි කිරීම සම්බන්ධයෙන් ව්යාපාරික ස්ථාන හිමිකරුවන් තිදෙනෙකුට (3) එරෙහිව නඩු පැවරීමට කටයුතු කර තිබෙනවා. මෙම වැටලීම, නගර වැසියන්ට සෞඛ්යාරක්ෂිත සහ පිරිසිදු ආහාර ලබාදීම අරමුණු කරගත් විශේෂ වැඩසටහනක කොටසක් ලෙස ක්රියාත්මක වී ඇති බව දෙහිවල-ගල්කිස්ස මහ නගර සභාවේ ප්රධාන මහජන සෞඛ්ය පරීක්ෂක ජී.එච්. වසන්ත පුෂ්පකුමාර මහතා ප්රකාශ කළා.
මෙම වැටලීමේදී, මිනිස් පරිභෝජනයට නුසුදුසු ආහාර ද්රව්ය වර්ග හතක් හිමිකරුවන්ගේම එකඟතාව මත එම ස්ථානවලදීම විනාශ කිරීමට මහජන සෞඛ්ය පරීක්ෂකවරුන් පියවර ගෙන තිබෙනවා.
දෙහිවල-ගල්කිස්ස නගරාධිපති පැරකුම් ශාන්ත, නාගරික කොමසාරිස් ඒ.එච්. විදුර සම්පත් සහ නියෝජ්ය නාගරික කොමසාරිස් අනූෂා කුමාරි යන මහත්ම මහත්මීන්ගේ පූර්ණ අධීක්ෂණය යටතේ දියත් කෙරුණු මෙම වැටලීම මෙහෙයවූ මහජන සෞඛ්ය පරීක්ෂක කණ්ඩායම විසින්, ආපනශාලා, හෝටල්, සහ වෙළෙඳසල් දොළහක් (12) පරීක්ෂාවට ලක් කරනු ලැබුවා.
එම පරීක්ෂණවලදී, පහත සඳහන් බරපතළ අඩුපාඩු රැසක් නිරීක්ෂණය වී ඇත:
- ආපනශාලා මුළුතැන්ගෙවල්වල බිම සහ සිවිලිම කඩතොළු වී තිබීම.
- බිත්ති අතර කැරපොත්තන්, කූඹින්, මීයන් සහ පූසන් වැනි සතුන් ගැවසෙමින් අතිශය අපිරිසිදු තත්ත්වයක පැවතීම.
- අලෙවියට තබා තිබූ අර්තාපල් වැනි අල වර්ගවල පණුවන් සිටීම.
- වෙනත් ආහාර ද්රව්ය නරක් වී තිබීම.
- ඇසුරුම් කළ භාණ්ඩවල කල් ඉකුත්වීමේ දිනයන් ඉක්මවා තිබීම.
මෙම බරපතළ අඩුපාඩු හේතුවෙන් අදාළ ව්යාපාරික ස්ථාන වෙත රතු නිවේදන (Red Notices) නිකුත් කිරීමට පියවර ගත් බවත්, ඉන් හිමිකරුවන් තිදෙනෙකුට (3) එරෙහිව අධිකරණයේ නඩු පැවරූ බවත් ප්රධාන මහජන සෞඛ්ය පරීක්ෂක වසන්ත පුෂ්පකුමාර මහතා වැඩිදුරටත් සඳහන් කළා.
මෙවැනි වැටලීම් තුළින් මහජන සෞඛ්ය ආරක්ෂාව තහවුරු කිරීමටත්, ව්යාපාරිකයන් වඩාත් වගකීමෙන් යුතුව කටයුතු කිරීමටත් අනුබලයක් ලැබෙනු ඇතැයි අපේක්ෂා කෙරේ.
