මහනුවර මහ රෝහල් පරිශ්‍රයේ ඉදිකිරීමක පින්තාරු කටයුතුවල නිරතව සිටි 71 හැවිරිදි පුද්ගලයෙකු එහි තෙවැනි මහලෙන් ඇද වැටීමෙන් ඊයේ (ජූලි 12) සවස් භාගයේදී ජීවිතක්ෂයට පත්ව තිබෙනවා.
මෙලෙස මරණයට පත්ව ඇත්තේ හාරිස්පත්තුව ප්‍රදේශයේ පදිංචිකරුවෙකු වන අතර, ඔහු සේවයේ නිරතව සිටියදී මෙම අවාසනාවන්ත සිදුවීම සිදුව ඇති බවයි වාර්තා වන්නේ.
අනතුරින් බරපල තුවාල ලැබූ මෙම පුද්ගලයා වහාම මහනුවර මහ රෝහලේ හදිසි ප්‍රතිකාර ඒකකයට ඇතුළත් කළ නමුත්, ප්‍රතිකාර ලබමින් සිටියදී ඔහු මියගොස් ඇති බව රෝහල් ආරංචි මාර්ග සඳහන් කරනවා.
ලැබුණු තොරතුරක් මත ක්‍රියාත්මක වූ මහනුවර පොලීසිය සිද්ධිය සම්බන්ධයෙන් පරීක්ෂණයක් ආරම්භ කර තිබෙනවා. මියගිය පුද්ගලයාගේ මෘත දේහය පශ්චාත් මරණ පරීක්ෂණ කටයුතු සඳහා මහනුවර රෝහලේ මෘත ශරීරාගාරයේ තබා ඇති අතර, සිද්ධිය පිළිබඳ වැඩිදුර විමර්ශන ක්‍රියාත්මකයි.
