මන්නාරම – නානාට්ටන් ප්රධාන මාර්ගයේ, නරුවිලිකුලම් ප්රදේශයේදී පසුගියදා (ජූලි 10) සවස සිදු වූ දරුණු රිය අනතුරකින් බරපතල තුවාල ලබා රෝහල් ගතව සිටින පියෙකු, තම කුඩා දරුවාගේ අජීවී දේහය දකින අවසන් ඡායාරූපය මාධ්ය වෙත නිකුත් වී තිබෙනවා. එය දුටු බොහෝ දෙනාගේ සිත් දැඩි ශෝකයෙන් හා සංවේගයෙන් පිරී ගියා.
මේ ඛේදජනක අනතුර සිදුවී ඇත්තේ පියෙකු, මවක්, 4 හැවිරිදි පුතෙකු සහ 12 හැවිරිදි දියණියක යතුරුපැදියකින් නරුවිලිකුලම් ප්රදේශයේ සිට නානාට්ටන් දෙසට ගමන් කරමින් සිටියදීයි. මන්නාරම දෙසට ධාවනය වූ රථයක් ඔවුන්ගේ යතුරුපැදියේ ගැටීමෙන් මේ සිව්දෙනාම බරපතල තුවාල ලබා මන්නාරම දිස්ත්රික් මහ රෝහලට ඇතුළත් කර තිබුණා.
කෙසේ වෙතත්, අනතුරින් බරපතල තුවාල ලැබූ 4 හැවිරිදි සිඟිති පුතු, ප්රතිකාර ආරම්භ කිරීමටත් පෙර ජීවිතයෙන් සමුගෙන ඇති බවට වාර්තා වුණා.
අනතුරින් බරපතල තුවාල ලැබූ පියා, මව සහ 12 හැවිරිදි දැරිය තවමත් මන්නාරම දිස්ත්රික් මහ රෝහලේ හදිසි ප්රතිකාර අංශයේ ප්රතිකාර ලබනවා. 12 හැවිරිදි දැරිය වැඩිදුර ප්රතිකාර සඳහා යාපනය රෝහලට මාරු කර යවා තිබෙනවා
මේ අවාසනාවන්ත තත්ත්වය තුළ, බරපතල තුවාල ලබා නැගිටීමට හෝ ඇවිදීමට නොහැකිව ප්රතිකාර ලබන පියා, තම සිඟිති පුතුගේ මරණය ගැන ඊයේ (ජූලි 11) වනතුරුම දැන සිටියේ නැහැ. ඊයේ දිනයේ ඔහුට පුතාගේ මරණය පිළිබඳ පුවත දැනුම් දුන් විට, එය ඔහුට දරාගත නොහැකි වේදනාවක් ගෙන ආ බව අමුතුවෙන් කිව යුතු නැහැ.
සිය පුතුට අවසන් ගෞරව දැක්වීම සඳහා, රෝහලේ සිටින තම අවුරුදු 4ක පුතාගේ දේහය පියාගේ රෝහල් ඇඳ අසලට ගෙන ඒමට සිදුවීම, සියල්ලන්ගේම සිත් සංවේගයෙන් බර කළ මොහොතක් වුණා. පියා රෝහල් ඇඳේ සිට තම ආදරණීය පුතුට අවසන් වරට සමුදුන් අයුරු දැක්වෙන ඡායාරූපය, මේ ඛේදවාචකයේ බරපතලකම මනාව කියාපානවා.
මියගිය පිරිමි ළමයාගේ දේහය පියාට පෙන්වීමෙන් අනතුරුව, අවසන් කටයුතු සඳහා ඥාතීන් වෙත භාර දී තිබෙනවා. මේ සිදුවීමෙන් විපතට පත්වූ පවුලට අපගේ ගැඹුරු සංවේගය පළ කරමු.
