රටේ ප්‍රමුඛතම සෞඛ්‍ය ආයතනයක් වන ශ්‍රී ජයවර්ධනපුර මහ රෝහල මේ වන විට බරපතළ පරිපාලන අර්බුදයකට මැදිවී ඇති බවට සෞඛ්‍ය අංශ ආරංචි මාර්ග අනාවරණය කරයි. මෙම තත්ත්වය හටගෙන ඇත්තේ රෝහලේ වත්මන් අධ්‍යක්ෂවරයා නිල වශයෙන් ඉවත් කිරීමටත් පෙර, එම තනතුරට වෙනත් වෛද්‍යවරයෙකු පත් කිරීමත් සමඟයි.
රෝහලේ අධ්‍යක්ෂවරයා ලෙස කටයුතු කළ වෛද්‍ය රත්නසිරි හේවගේ මහතා මේ වන විට අසනීප තත්ත්වයක් හේතුවෙන් නිවාඩු ලබා සිටිනවා. එවන් පසුබිමක, සෞඛ්‍ය ලේකම්වරයා විසින් එම තනතුරට නව පත්කිරීමක් සිදුකර ඇති බවයි වාර්තා වන්නේ. කෙසේ වෙතත්, ශ්‍රී ජයවර්ධනපුර රෝහල් පනතට අනුව, තනතුරු සඳහා පත්කිරීම් සිදුකිරීමේ හා ඉවත් කිරීමේ බලය පැවරී ඇත්තේ රෝහල් අධ්‍යක්ෂ මණ්ඩලයට පමණයි. සෞඛ්‍ය ලේකම්වරයාට එවැනි බලතල නොමැති බව සෞඛ්‍ය අංශ අවධාරණය කරයි.
වෛද්‍ය රත්නසිරි හේවගේ මහතා සිය පස් අවුරුදු සේවා කාලයෙන් අනතුරුව අමාත්‍යාංශයට මාරුවීමක් ඉල්ලා රාජ්‍ය සේවා කොමිසමට ඉල්ලීමක් ඉදිරිපත් කර තිබුණද, එම ඉල්ලීම ප්‍රතික්ෂේප වී තිබූ පසුබිමක මෙම නව පත්කිරීම සිදුකර තිබීම නීති විරෝධී බවට චෝදනා එල්ල වේ. තවද, වෛද්‍ය හේවගේ මහතා තනතුරෙන් නිල වශයෙන් ඉවත් කළ බවට ලිඛිත දැනුම් දීමක් හෝ ඒ සඳහා රාජ්‍ය සේවා කොමිසමේ අනුමැතිය ලද ලිපියක් හෝ ඔහුට ලැබී නොමැති වීම තත්ත්වය තවදුරටත් සංකීර්ණ කරයි.
මෙම උග්‍ර පරිපාලන අර්බුදයට අමතරව, ශ්‍රී ජයවර්ධනපුර රෝහල මේ වන විට විශේෂඥ වෛද්‍යවරුන්ගේ හිඟයකට ද මුහුණ පා සිටී. රෝහලේ විකලාංග ශල්‍ය විශේෂඥ වෛද්‍යවරයා පසුගිය සතියේ පෞද්ගලික හේතූන් මත ඉල්ලා අස්වී ඇති අතර, ස්නායු ශල්‍ය වෛද්‍ය විශේෂඥ මහේෂි විජේරත්න මහත්මිය මේ වන විට රක්ෂිත බන්ධනාගාර ගත කර සිටීම තත්ත්වය තවත් අඳුරු කර තිබේ.
මෙම තත්ත්වය හමුවේ, විශේෂඥ වෛද්‍යවරුන්ගේ සංගමය සෞඛ්‍ය අමාත්‍ය වෛද්‍ය නලින්ද ජයතිස්ස මහතා වෙත ලිපියක් යොමු කරමින්, රෝහල සම්බන්ධයෙන් විවිධ මාධ්‍ය ඔස්සේ පළවන තොරතුරු පිළිබඳව සිය සංගමය දැඩි කනස්සල්ලෙන් පසුවන බව දන්වා ඇත. එමෙන්ම, මේ පිළිබඳව පූර්ණ පරීක්ෂණයක් පවත්වා විශේෂඥ තාක්ෂණික වාර්තාවක් ලබා දෙන ලෙස ද ඔවුන් අමාත්‍යවරයාගෙන් ඉල්ලා තිබේ.
ශ්‍රී ජයවර්ධනපුර මහ රෝහල වැනි ප්‍රධාන සෞඛ්‍ය ආයතනයක මෙවැනි පරිපාලන සහ කාර්යමණ්ඩල ගැටලු මතුවීම රටේ සෞඛ්‍ය සේවාව කෙරෙහි සෘජුවම බලපෑම් කළ හැකි බැවින්, මේ පිළිබඳව වහාම අවධානය යොමු කිරීම අත්‍යවශ්‍ය වේ.
