මාතර සිට නුවරඑළිය බලා විනෝද චාරිකාවක් යමින් සිටි තරුණයින් පිරිසක් ගමන් ගත් වෑන් රථයක් නානුඔය ප්‍රදේශයේදී ප්‍රපාතයකට පෙරළී යාමෙන් පුද්ගලයින් අට දෙනෙකු තුවාල ලබා තිබේ. තුවාල ලැබූවන් මේ වන විට නුවරඑළිය දිස්ත්‍රික් මහ රෝහල වෙත ඇතුළත් කර ප්‍රතිකාර ලබන බව වාර්තා වේ.
නානුඔය පොලීසිය විසින් සිදුකළ විමර්ශන අනුව, මෙම අනතුර ඊයේ (ජූලි 10) අලුයම 5:00ට පමණ නුවරඑළිය – හැටන් ප්‍රධාන මාර්ගයේ, ඩෙස්ෆෝඩ් වතුයාය ආසන්නයේදී සිදුවී ඇත. අදාළ වෑන් රථය මාර්ගයෙන් ඉවතට පැන අඩි 70ක් පමණ ගැඹුරු ප්‍රපාතයකට පෙරළී ඇති බවට තොරතුරු අනාවරණය වී තිබේ.
අනතුරට පත් වූවන් රෝහල් ගත කිරීම සඳහා ප්‍රදේශයේ වතු කම්කරුවන්ගේ සක්‍රීය සහයෝගය ලැබී ඇති අතර, එය තුවාලකරුවන්ට කඩිනම් ප්‍රතිකාර ලබා දීමට ඉවහල් වී ඇත.
මූලික පොලිස් විමර්ශනවලදී සැක පළ වී ඇත්තේ, අධික වෙහෙස හේතුවෙන් රියදුරුට නින්ද යාම මෙම අනතුරට ආසන්නතම හේතුව වන්නට ඇති බවයි. නානුඔය පොලීසිය සිද්ධිය සම්බන්ධයෙන් වැඩිදුර පරීක්ෂණ පවත්වයි.
