ගල්නෑව – පත්තිනිගම ප්රදේශයේ නිවසකට ඇතුළු වී අපරාධයක් සිදු කිරීමට තැත් කළ, වලාන දූෂණ මර්දන ප්රහාරක ඒකකයේ සහ පොලිස් විශේෂ කාර්ය බලකා නිල ඇඳුම්වලට සමාන ඇඳුම්වලින් සැරසුණු කණ්ඩායමකට අයත් තවත් සාමාජිකයෙකු පොලිස් අත්අඩංගුවට ගෙන තිබේ.
ඔහු අත්අඩංගුවට ගෙන ඇත්තේ ඔහු සන්තකයේ තිබී වෑන් රථයක් ද සමගිනි. ගල්නෑව පොලීසිය විසින් මෙලෙස අත්අඩංගුවට ගනු ලැබුවේ කුරුණෑගල – මාවතගම ප්රදේශයේ පදිංචි 35 හැවිරිදි පුද්ගලයෙකි.
ගල්නෑව පොලිස් විශේෂ කාර්යාංශයේ සහ කොට්ඨාස බුද්ධි අංශ නිලධාරීන්ගෙන් ලද තොරතුරු අනුව, සැකකරු සහ අදාළ වෑන් රථය මාවතගම පිහිටි සැකකරුගේ නිවසේදී සොයා ගනු ලැබීය.
මෙම සිද්ධිය සම්බන්ධයෙන් පොලීසිය අත්අඩංගුවට ගත් 06 වන සැකකරු මොහු වන අතර, මෙම වෑන් රථය ද සිද්ධියට සම්බන්ධයෙන් පොලිස් අත්අඩංගුවට ගෙන ඇති තුන්වැනි වාහනය වේ.
පොලිස් හා විශේෂ කාර්ය බලකා නිල ඇඳුම්වලින් සැරසුණු මෙම සංවිධානාත්මක කල්ලිය මෙහෙයවා ඇති බව කියන අනුරාධපුර ප්රදේශයේ කාන්තාවට ඇතැම් අවස්ථාවලදී සැකකරු මෙම වෑන් රථයෙන් ගමන් පහසුකම් සපයා ඇති බවට පොලිස් විමර්ශනවලදී අනාවරණය වී තිබේ. සිද්ධිය සිදු වූ දින සැකකරුවන් වෙස්වලා ගත් බව කියන ගල්නෑව – බුල්නෑව ප්රදේශයේ පිහිටි නිවසක් වෙත ද සැකකරු මෙම වෑන් රථයෙන් පැමිණ ඇති බවට තොරතුරු අනාවරණය වී ඇත.
සැකකරු අද (ජූලි 10) කැකිරාව මහේස්ත්රාත් අධිකරණය හමුවට ඉදිරිපත් කිරීමට නියමිතය.
මෙම සිද්ධිය සම්බන්ධයෙන් මින් පෙර පොලිස් අත්අඩංගුවට ගෙන ගැනුණු කාන්තාවක් ඇතුළු සැකකරුවන් පස් දෙනෙකු පසුගියදා අධිකරණයට ඉදිරිපත් කිරීමෙන් පසු ලබන 18 වනදා දක්වා රක්ෂිත බන්ධනාගාර ගත කර සිටී.
