බස්නාහිර ත්‍රීවීල් රියදුරන්ට අනිවාර්ය නව නීතියක්: රු. 500ට බලපත්‍රයක්!

බස්නාහිර පළාතේ මගී ප්‍රවාහනයේ නිරත වන සියලුම ත්‍රිරෝද රථ සඳහා විශේෂ අවසර පත්‍රයක් ලබා ගැනීම අනිවාර්ය කරමින් නව නීතියක් ක්‍රියාත්මක කිරීමට බස්නාහිර පළාත් මගී ප්‍රවාහන අධිකාරිය තීරණය කර තිබෙනවා. ඉදිරියේදී මෙම බලපත්‍රය නොමැති කිසිදු ත්‍රිරෝද රථයකට මගීන් ප්‍රවාහනය කිරීමට අවසර නොලැබෙන බවයි ඔවුන් අවධාරණය කරන්නේ. මෙම නව වැඩපිළිවෙල යටතේ ත්‍රිරෝද රථ ලියාපදිංචි කිරීමේ ක්‍රියාවලිය අද (පළමුවැනිදා) සිටම ආරම්භ වන බව, එම අධිකාරියේ කළමනාකාර (ධාවන) ජීවන්ත කීර්තිරත්න මහතා ප්‍රකාශ කළා. ත්‍රිරෝද රථ හිමියන්ට ලියාපදිංචි වීම සඳහා යම් කාල සීමාවක් ලබා දෙන අතර, එම කාලය අවසන් වූ පසු බලපත්‍ර රහිතව මගී සේවයේ යෙදෙන ත්‍රිරෝද රථ සඳහා නීතිය දැඩිව ක්‍රියාත්මක කිරීමට නියමිතයි. බස්නාහිර පළාතේ ලක්ෂ තුනකට අධික ත්‍රිරෝද රථ ප්‍රමාණයක් ඇති බවට ගණන් බලා ඇති අතර, දැනටමත් ත්‍රිරෝද රථ හිමියන් දැනුවත් කිරීමේ වැඩසටහන් ආරම්භ කර ඇති බවද කීර්තිරත්න මහතා සඳහන් කළා. මෙම ලියාපදිංචිය සඳහා එක් ත්‍රිරෝද රථයකින් රුපියල් 500ක ගාස්තුවක් අය කිරීමට නියමිත බවයි වාර්තා වන්නේ. ඉතින්, මේ නව නීතිය ත්‍රීවීල් රියදුරන්ට සහ මගීන්ට කොහොම බලපායිද කියලා බලමු!