බන්දු සමරසිංහගේ නොසිතූ රංගනයෙන් ‘වස්ති’ යූටියුබ් හොල්ලයි!

පසුගිය නොවැම්බර් 16 වනදා Wasthi Productions විසින් ඔවුන්ගේ නවතම වීඩියෝව වන ‘දෝණි’ එළිදැක්වීමත් සමඟ ලංකාවේ සමාජ මාධ්‍ය පුදුමයෙන් ඇලලී ගියා. සාම්ප්‍රදායික හාස්‍යයෙන් ඔබ්බට ගිය නිර්මාණ සමඟින් ප්‍රේක්ෂකයන් අතරට එන අනුෂ්ක සහ දුලාජ් ප්‍රමුඛ Wasthi කණ්ඩායම, මෙවරත් අතිශය සාර්ථක නිර්මාණයක් බිහිකර තිබෙනවා. මෙම වීඩියෝවේ විශේෂත්වය වන්නේ, මෙතෙක් හාස්‍ය රංගනයෙන් පමණක් දැක පුරුදු, ප්‍රවීණ රංගන ශිල්පී බන්දු සමරසිංහ මහතාගේ වෙනස්ම රංග ප්‍රතිභාවයක් දැක ගැනීමට ලැබීමයි. බන්දු මහතා තම ෆේස්බුක් පිටුවේ සඳහන් කර තිබුණේ, Wasthi කණ්ඩායම තමන්ගෙන් සහයෝගයක් ඉල්ලා සිටි බවත්, ඔවුන්ගේ ‘දෝණි’ YouTube මුහුරත් උළෙලට හදවතින්ම දායක වූ බවත්ය. වීඩියෝව නැරඹූ බොහෝ දෙනෙකු පෙන්වා දුන්නේ, බන්දු සමරසිංහ මහතාගේ රංගන හැකියාව හාස්‍යයට පමණක් සීමා නොවන බවත්, ඔහුට දුෂ්ට හෝ අදුෂ්ට චරිත පවා නිරූපණය කිරීමට විශිෂ්ට හැකියාවක් ඇති බවත්ය. සමහර ප්‍රේක්ෂකයින් පවසා තිබුණේ, අපේ සිනමා අධ්‍යක්ෂකවරුන්ට මෙවැනි දක්ෂතා නිසි ලෙස ප්‍රයෝජනයට ගැනීමට නොහැකි වූ බවත්, Wasthi වැනි නව පරපුරේ content creators ලා තමයි මෙවැනි දේ හරියට කරන්නේ කියලත්ය. ඔවුන් චෝදනා කරන්නේ බොහෝ සිනමා නිර්මාණ හින්දි හෝ දමිළ චිත්‍රපටවල පිටපත් බවට පත්ව ඇති බවයි. තවද, කරන හැම ගීතයක්ම ජනප්‍රිය වන චමත් සංගීත් විසින් මෙම වීඩියෝවේ සංගීත අධ්‍යක්ෂණය සිදුකර තිබීමත් තවත් විශේෂත්වයකි. ‘දෝණි’ වීඩියෝව මේ වන විටත් ප්‍රේක්ෂක ප්‍රතිචාර අතින් ඉහළින්ම සිටින අතර, එය ලංකාවේ YouTube ලෝකයට නව මානයක් එකතු කර ඇති බව නොඅනුමානය.