ප්‍රවීණ ලේඛක සුජීව ප්‍රසන්න ආරච්චිගේ ජනප්‍රිය නවකතාවක් වන “වර්ෂා” දැන් දැවැන්ත ටෙලි සිත්තමක් ලෙසින් අප ඉදිරියට ඒමට සූදානම්. ලංකාවේ ටෙලිනාට්‍ය ක්ෂේත්‍රයේ නවමු අත්දැකීමක් සනිටුහන් කරමින්, ජාත්‍යන්තර සිනමා නිර්මාණකරණයෙන් ලොවම හඳුනන ‘ලයිකා ප්‍රඩක්ෂන්ස්’ (Lyca Productions) ආයතනය, ස්වර්ණවාහිනී මාධ්‍ය ජාලය සමඟ මෙම අති දැවැන්ත නිර්මාණය ප්‍රේක්ෂකයන් වෙත ගෙන ඒමට නියමිතයි. මේ දිනවල කලා ලොවේ උණුසුම්ම මාතෘකාව බවට පත්ව ඇත්තේ මෙම ටෙලිනාට්‍යයේ ප්‍රධාන චරිතය වන ‘වර්ෂා’ට පණ පොවන්නේ කවුරුන්ද යන්නයි. ඒ සඳහා, මෑත ඉතිහාසයේ ටෙලිනාට්‍ය චරිතයක් වෙනුවෙන් පැවැත්වූ දැවැන්තම තේරීම් පරීක්ෂණය (Audition) අද (03) ස්වර්ණවාහිනී පරිශ්‍රයේදී සාර්ථකව පැවැත්වුණා. ‘වර්ෂා’ වීමේ සිහිනය හදවතේ දරාගත් නවක මෙන්ම ප්‍රවීණ රංගන ශිල්පිනියන් විශාල පිරිසක් මේ සඳහා සහභාගී වී සිටි අතර, එහිදී ඔවුන්ගේ දක්ෂතා විදහා දැක්වූ බව වාර්තා වේ. මෙම තේරීම් පරීක්ෂණයේ විනිශ්චය මණ්ඩලයද අතිශය ප්‍රවීණයන්ගෙන් සමන්විත වීම විශේෂත්වයක්. ප්‍රවීණ සිනමා නළු සනත් ගුණතිලක මහතා, ටෙලිනාට්‍යයේ අධ්‍යක්ෂක හසුන් සමීර මහතා ඇතුළු ක්ෂේත්‍රයේ දැවැන්තයන් රැසක් විනිශ්චය මණ්ඩලය නියෝජනය කළා. මෙම සුවිශේෂී අවස්ථාව පිළිබඳව ‘වර්ෂා’ නවකතාවේ නිර්මාතෘ, සුජීව ප්‍රසන්න ආරච්චි මහතා සිය ෆේස්බුක් ගිණුමේ සංවේදී සටහනක් තබා තිබුණා. “අද ‘වර්ෂා’ දෘෂ්‍යමය නිර්මාණය සඳහා වර්ෂාව තෝරාගන්නා ඔඩිෂන් එක ‘සවර්ණවාහිනී’ නාලිකා පරිශ්‍රයේදී සිදුකෙරෙනවා. මෑත කාලයේ ශ්‍රී ලංකාවේ ටෙලි නාට්‍ය චරිතයක් වෙනුවෙන් පවත්වන දැවැන්තම ඔඩිෂන් එක එයම වේවි..! ස්වර්ණවාහිනී මාධ්‍ය ජාලයත්, ලයිකා ප්‍රඩක්ෂන්ස් නිෂ්පාදන ආයතනයත් ඒ වෙනුවෙන් සියලු කටයුතු දැන් සූදානම් කර අවසන්. නමුත්,,,,,,,, මේ කඳුළු උතුරන දෑස, දෑසකින් දකිනතුරු සැබෑ වර්ෂා සිහිනයක්..!” යනුවෙන් ඔහු සඳහන් කර තිබුණා. ලයිකා වැනි දැවැන්ත නිෂ්පාදන සමාගමක් ස්වර්ණවාහිනිය සමඟ එක්ව මෙවැනි නිර්මාණයක් කිරීම ශ්‍රී ලාංකීය ටෙලි නාට්‍ය වංශ කතාවේ නවමු පරිච්ඡේදයක් සනිටුහන් කරනු නොඅනුමානයි. අධ්‍යක්ෂක හසුන් සමීරගේ දෘෂ්‍යමය කියවීමෙන් සහ මෙම ප්‍රවීණ විනිශ්චය මණ්ඩලයේ තෝරාගැනීමෙන්, පොතේ පිටු අතර සැඟවී සිටි ‘වර්ෂා’ට සැබෑ ලෙසම පණ දෙන්නට සමත් වන්නේ කවුරුන්ද යන්න පිළිබඳව මුළු රටම මේ වන විට සිටින්නේ නොඉවසිලිමත් අපේක්ෂාවකිනි. ඒ වාසනාවන්තිය කවුරුන්දැයි දැනගන්නා තුරු Gossip King අපිත් ඔබ සමඟ නොඉවසිල්ලෙන් බලා සිටිමු!
