ශ්‍රී ලංකා ක්‍රිකට් ක්‍රීඩක ධනුෂ්ක ගුණතිලක කාන්තාවකට අතවර කිරීමේ චෝදනාවට වරදකරු නොවන බව ඕස්ට්‍රේලියා අධිකරණය තීන්දු කර තිබෙනවා.
පසුගිය 21 වනදා නඩු විභාගය සිඩ්නි නුවර නිව් සවුත්වේල්ස් දිස්ත්‍රික් අධිකරණයේ දී අවසන් වූ අතර එහි තීන්දුව අද (28) ප්‍රකාශ කරමින් ධනුෂ්ක ගුණතිලක නිදොස් කොට නිදහස් කිරීමට අධිකරණය තීන්දු කළා.
විනිසුරු සාරා හගෙට් විසින් සිඩ්නි ඩව්නිං සෙන්ටර් දිස්ත්‍රික් උසාවියේ දී ධනුෂ්ක ගුණතිලක නිදොස් කොට නිදහස් කළ බවට තීන්දුව ලබාදුන්නා.
සමාජ මාධ්‍ය යෙදවුමක් වන Tinder යෙදවුම ඔස්සේ හමු වූ කාන්තාවක් ලිංගිකව අපයෝජනය කිරීම යන චෝදනාව යටතේ ධනුෂ්ක ගුණතිලකට චෝදනා එල්ල වී තිබුණා.
කොහොමවුණත් උසාවි සංකීර්ණයෙන් පිටතට පැමිණි ධනුෂ්ක ගුණතිලක මුල්වරට මාධ්‍ය වෙත මෙලෙස අදහස් පළ කළා.
“මට තවත් ප්‍රකාශ කරන්න වැඩි දෙයක් නැහැ. මම හිතනවා විනිසුරුවරිගේ තීන්දුවෙන් සියලු දේ කියවුණා කියලා. මගේ මේ දුෂ්කර කාලයේදී සහයෝගය දැක්වූ සියලුදෙනාට මේ අවස්ථාවේ ස්තූති කරන්න කැමතියි. පසුගිය මාස 11ක පමණ කාලය මට අතිශයින්ම දුෂ්කර කාලයක් වුණා. විශේෂයෙන් මගේ නීතිඥයින්ට. නීතිඥ මුරුගන් තංගරාජ් අද මෙහි පැමිණ නැතත් ඔහු සහ අනෙකුත් නීතිඥයින්ට බොහොම ස්තූතියි. මගේ කළමනාකරු, එලීන් සහ මගේ දෙමාපියන්, ලංකාවේ තවත් කිහිපදෙනෙක් මාව විශ්වාස කළා. එය මට ලොකු ධෛර්යයක් වුණා. අවසානයේ විනිසුරුවරිය නිවැරදි තීරණයකට පැමිණියා. මම කලින් ප්‍රකාශ කළ පරිදි ඒ තීන්දුවෙන් සියල්ල කියවෙනවා. මගේ ජීවිතය සාමාන්‍ය තත්ත්වයට පත්වීම ගැන මම ඇත්තෙන්ම සතුටුයි. නැවතත් ආපසු ගොස් ක්‍රිකට් ක්‍රීඩාවේ නිරත වන තුරු මම ඉන්නේ නොඉවසිල්ලෙන්”
