හොරොව්පොතාන ප්‍රදේශයේ තරුණයෙකුට සිය ටික්ටොක් පෙම්වතිය පළමු වරට හමුවීමට ගොස් අත්විඳීමට සිදුවූ අකරතැබ්බයක් පිළිබඳව අපට වාර්තා වේ. අපගේ කතා නායකයා, විසි හැවිරිදි වියේ පසුවන, ප්‍රදේශයේ කා අතරත් ප්‍රසිද්ධ ටික්ටොක් තරුවකි. සිය ජංගම දුරකථනයෙන් ටික්ටොක් ලෝකයේ සැරිසරන මොහුට, මීට මාස කිහිපයකට පෙර එක්තරා සුරූපී තරුණියකගේ ටික්ටොක් ගිණුමක් හමුවී තිබේ. ඇයගේ වීඩියෝවලට වශී වූ අපේ කතා නායකයා, ඇය හා සම්බන්ධයක් ගොඩනගා ගැනීමට සමත් වී ඇත.
දිනෙන් දින වර්ධනය වූ මෙම සයිබර් සබඳතාව, සැබෑ ලෝකයේදී හමුවීමට තීරණය කර ඇත්තේ පසුගිය සතියේදීය. ඒ අනුව, අපේ ටික්ටොක් මනමාලයා, තමාගේ සිහින කුමරියව බැහැ දැකීමට හොරොව්පොතානේ සිට ඇය පැවසූ නගරයට මහත් බලාපොරොත්තු රැසක් පොදි බැඳගෙන පිටත්ව ගොස් තිබේ. අදාළ ස්ථානයට ගොස් ඇය එන තෙක් නොඉවසිල්ලෙන් බලා සිටි මොහුට, දුර තියාම එන කාන්තාවකගේ රුව දැක හදවත වේගයෙන් ගැහෙන්නට පටන් ගෙන ඇත.
නමුත්, ඔහු අසලට පැමිණි ඇය, “බබා, මම මෙතන” යැයි පැවසූ විට අපේ වීරයාගේ සියලු බලාපොරොත්තු සුන්වී ගොස් තිබේ. ඒ, ටික්ටොක් වීඩියෝ වල දුටු සුරූපී තරුණිය වෙනුවට, තමාට වඩා අවුරුදු විස්සකින් පමණ වැඩිමල් පෙනුමැති කාන්තාවක් ඔහු ඉදිරියේ සිටි බැවිනි. තමා ඇමතූයේ “බබා” කියාද නැතහොත් “පුතා” කියාද යන්න මොහොතකට සිතා ගැනීමටවත් නොහැකි වූ බව ඔහු සිය මිතුරන් සමග පවසා තිබිණි.
කෙසේ වෙතත්, තරුණයා එම ස්ථානයෙන් ක්ෂණිකව මාරුවී සිය නිවස බලා පිටත්ව ඇති අතර, එතැන් පටන් ඔහුගේ ටික්ටොක් ගිණුමද අක්‍රිය වී ඇති බවට ප්‍රදේශවාසීන් පවසයි. මෙම සිදුවීමත් සමග, සමාජ මාධ්‍ය හරහා ගොඩනැගෙන සබඳතා වල යථාර්ථය පිළිබඳව හොරොව්පොතාන තරුණයන් අතර මේ දිනවල උණුසුම් කතාබහක් නිර්මාණය වී ඇති බවද අපට ආරංචි විය.
