Spider-Man රූගත කිරීම් අතරතුර Tom Hollandට සිදුවූ අනතුර!

ලොව පුරා රසිකයින්ගේ ආදරය දිනාගත් ජනප්‍රිය හොලිවුඩ් නළු Tom Holland, ඔහුගේ ඉදිරි Marvel චිත්‍රපටය වන Spider-Man: Brand New Day හි රූගත කිරීම් අතරතුර අනතුරකට ලක්ව ඇති බවට වාර්තා වේ. Deadline වාර්තා කරන ආකාරයට, Glasgow හිදී සිදු වූ දර්ශනයක් රූගත කිරීමේදී සිදුවූ ස්ටන්ට් දෝෂයක් හේතුවෙන් Tom Holland සුළු මොළයේ කම්පනයකට ලක්ව රෝහල් ගත කර තිබේ. මෙම අනතුරෙන් පසු චිත්‍රපටයේ රූගත කිරීම් දින කිහිපයකට අත්හිටුවා ඇති අතර, අනතුරට ලක්ව ඇත්තේ ඔහු පමණක් බවද සඳහන්ය. මේ වන විට Tom Holland ප්‍රවේශම්කාරීව විවේක ගනිමින් සිටින අතර, ඉදිරි රූගත කිරීම් සැලසුම් සකස් කිරීම සඳහා සාකච්ඡාවක් පැවැත්වීමට නියමිතයි. Spider-Man: Brand New Day චිත්‍රපටයේ රූගත කිරීම් අගෝස්තු මස මුලදී Glasgow හිදී ආරම්භ වූ අතර, 2026 ජූලි මාසයේදී චිත්‍රපටය තිරගත වීමට නියමිතව ඇත. මෑතකදී, චිත්‍රපට කණ්ඩායම නව Spidey ඇඳුමක් එළිදක්වා ඇති අතර, Tom Holland ද එය පැළඳ සිටින වීඩියෝවක් නිකුත් කරමින් රසිකයින්ට ‘සූදානම්ද?’ යනුවෙන් අසා තිබුණි. මෙම නව ඇඳුම Tobey Maguire සහ Andrew Garfield ගේ Spider-Man ඇඳුම්වලට සමාන සම්භාව්‍ය පෙනුමක් ඇති බවටද තොරතුරු වාර්තා වේ.