පාර්ලිමේන්තුවේ නිල වෙබ් අඩවිය අලුත් වෙයි: නව විශේෂාංග රැසක් සමඟින් ජනතාවට සමීප වෙයි

ශ්‍රී ලංකා පාර්ලිමේන්තුවේ වසර 19ක් පුරා ක්‍රියාත්මක වූ නිල වෙබ් අඩවිය නවීන අවශ්‍යතා සපුරාලමින්, විශේෂාංග රැසකින් සමන්විතව 2025 නොවැම්බර් 27 වන දින ගරු කථානායක ආචාර්ය ජගත් වික්‍රමරත්න මහතාගේ ප්‍රධානත්වයෙන් පාර්ලිමේන්තු පරිශ්‍රයේදී දියත් කෙරිණි. මෙම අවස්ථාවට ගරු නියෝජ්‍ය කථානායක ආචාර්ය රිස්වි සාලි මහතා සහ පාර්ලිමේන්තුවේ මහලේකම් කුෂානි රෝහණදීර මහත්මියද සහභාගී විය. 2006 වසරේදී ප්‍රථම වරට නිර්මාණය කර දියත් කරන ලද ශ්‍රී ලංකා පාර්ලිමේන්තු නිල වෙබ් අඩවිය, එතැන් සිට දෙවරක් යාවත්කාලීන කර ඇති අතර, මෙය නිල පාර්ලිමේන්තු වෙබ් අඩවියේ තුන්වන ප්‍රධාන ප්‍රතිනිර්මාණය ලෙස සනිටුහන් වේ. ගරු කථානායක ආචාර්ය ජගත් වික්‍රමරත්න මහතාගේ මගපෙන්වීම යටතේ සහ පාර්ලිමේන්තුවේ මහලේකම් කුෂානි රෝහණදීර මහත්මියගේ හා ලේකම් කාර්යාලයේ ජ්‍යෙෂ්ඨ කළමනාකාරිත්වයේ අධීක්ෂණය යටතේ, ජාතික ප්‍රජාතන්ත්‍රවාදී ආයතනයේ (NDI) පූර්ණ සහයෝගය ඇතිව, Techgeeks (Pvt) Ltd ආයතනය සමඟ එක්ව පාර්ලිමේන්තුවේ තොරතුරු පද්ධති හා කළමනාකරණ දෙපාර්තමේන්තුව විසින් මෙම වෙබ් අඩවිය ප්‍රතිසංස්කරණය කරන ලදී. නව පාර්ලිමේන්තු වෙබ් අඩවිය නවීන අවශ්‍යතාවලට ගැලපෙන පරිදි, පහසු ප්‍රවේශයක් ලබා දෙමින් සහ අමතර විශේෂාංග රැසක් ඇතුළත් කර සංවර්ධනය කර ඇත. වෙබ් අඩවියේ ඇති “මගේ පාර්ලිමේන්තුව” ද්වාරය (My Parliament portal) හරහා සෑම පුරවැසියෙකුටම දැන් පාර්ලිමේන්තුව සහ එහි මන්ත්‍රීවරුන් සමඟ සෘජුව සම්බන්ධ වීමට හැකියාව ලැබේ. වෙබ් අඩවියේ ලියාපදිංචි වීමෙන් මහජනතාවට පාර්ලිමේන්තුව විසින් සපයනු ලබන සේවාවන් පහසුවෙන් ලබා ගත හැක. මීට අමතරව, පාර්ලිමේන්තුව සමඟ කටයුතු කරන රාජ්‍ය සේවකයින්ටද මෙම ලියාපදිංචි කිරීමේ ක්‍රියාවලිය හරහා ඔවුන්ගේ නිල කටයුතු පහසු කර ගත හැකිය. පාර්ලිමේන්තු වෙබ් අඩවිය ජාතික තරඟවලදී වසර ගණනාවක් පුරා “හොඳම රාජ්‍ය වෙබ් අඩවිය” සහ “හොඳම බහුභාෂා වෙබ් අඩවිය” ලෙස පිළිගෙන ඇති, සම්මානලාභී රාජ්‍ය වෙබ් අඩවියකි. සිංහල, දෙමළ සහ ඉංග්‍රීසි යන භාෂා ත්‍රිත්වයෙන් ක්‍රියාත්මක වන මෙම වෙබ් අඩවිය ඉදිරියේදී තවදුරටත් වැඩිදියුණු කිරීමට සැලසුම් කර ඇත. මෙම අවස්ථාවට ශ්‍රී ලංකා පාර්ලිමේන්තුවේ තොරතුරු පද්ධති හා කළමනාකරණ දෙපාර්තමේන්තුවේ අධ්‍යක්ෂ එන්.බී.යූ. නාවගමුව මහතා ඇතුළු නිලධාරීන් මෙන්ම Techgeeks (Pvt) Ltd හි කළමනාකාර අධ්‍යක්ෂ කසුන් ගමගේ මහතා සහ සමාගමේ නිලධාරීන් ද සහභාගී වූහ.