දිට්වා සුළි කුණාටුවේ දරුණු බලපෑමෙන් ශ්රී ලංකාව මහත් සේ පීඩා විඳිද්දී, අසල්වැසි ඉන්දියාව ‘සාගර් බන්ධු’ මෙහෙයුම යටතේ අතිවිශේෂ මානුෂීය සහන මෙහෙයුමක් දියත් කර තිබෙනවා. මේ පිළිබඳව ඉන්දීය අග්රාමාත්ය නරේන්ද්ර මෝදි මහතා සහ ශ්රී ලංකා ජනාධිපති අනුර කුමාර දිසානායක මහතා අතර දුරකථන සංවාදයක් පවා සිදුවී ඇති අතර, ඉන්දියාවේ අඛණ්ඩ සහයෝගය පිළිබඳව එහිදී සහතික වී තිබීම විශේෂත්වයක්. ඉන්දීය ගුවන් හමුදාවේ (IAF) C-130J ගුවන් යානයක් මගින් ශ්රී ලංකාවට අත්යවශ්ය වෛද්ය සහ ආපදා ප්රතිචාර සැපයුම් ටොන් 10ක් පමණ ගෙනැවිත් තිබෙනවා. මේ අතර ‘BHISHM’ නම් වූ නවීනතම මොඩියුලර් කම්පන කියුබ් වැනි ජංගම වෛද්ය ඒකක ද ඇතුළත් වීම කැපී පෙනෙනවා. කම්පන විශේෂඥයින්, හදිසි වෛද්යවරුන් සහ පරිපූරක වෛද්යවරුන්ගෙන් සමන්විත ඉන්දීය වෛද්ය කණ්ඩායම් මෙරට වෛද්ය කණ්ඩායම් සඳහා පුහුණුව ලබා දීමට ද කටයුතු කර තිබෙනවා. මේ අතර INS සුකන්යා නෞකාවෙන් තවත් අත්යවශ්ය සහන ආධාර ටොන් 12ක් ත්රිකුණාමලයට පැමිණි අතර, ඒවා වහාම බෙදා හැරීමට සූදානම් කර ඇත. NDRF සහ IAF කණ්ඩායම් විසින් ජීවිතාරක්ෂක ඉවත් කිරීමේ කටයුතු දිගටම සිදුකරන අතර, වයසක අය, ගැබිනි කාන්තාවන්, ළමයි, සුරතල් සතුන් ඇතුළු අතරමං වූ පුද්ගලයින් 43 දෙනෙකු බේරා ගැනීමට NDRF සමත් වී තිබෙනවා. IAF හි MI 17 හෙලිකොප්ටර් දෙකක් මගින් ද පුද්ගලයන් 96 දෙනෙකු බේරාගෙන ඇති අතර, ගංවතුරෙන් පීඩාවට පත් ප්රදේශවලට ආහාර සහ වෛද්ය උපකරණ ටොන් 5.5කට වඩා ගුවනින් හෙළා තිබීම ද මෙහිදී සඳහන් කළ යුතුයි. ඉන්දියාව මේ අසීරු මොහොතේ ශ්රී ලංකාවේ ජනතාව සමඟ ස්ථිරව සිටින බවට මේ හරහා නැවතත් තහවුරු වී තිබෙනවා.
