රියදුරු බලපත්‍ර කල් ඉකුත් වුණාද? බයවෙන්න එපා! මෙන්න විශේෂ සහනයක්!

දිවයින පුරා පවතින අයහපත් කාලගුණික තත්ත්වය සහ ස්වභාවික ආපදා හේතුවෙන් බොහෝ රියදුරන්ට තම කල් ඉකුත් වූ රියදුරු බලපත්‍ර අලුත් කර ගැනීමට මෝටර් රථ ප්‍රවාහන දෙපාර්තමේන්තු කාර්යාල වෙත පැමිණීමට බාධා මතුවී ඇති බව රහසක් නොවේ. මේ තත්ත්වය පිළිබඳව විශේෂ අවධානය යොමු කරමින්, රියදුරන්ට විශාල සහනයක් ලබා දීමට මෝටර් රථ ප්‍රවාහන දෙපාර්තමේන්තුව තීරණය කර තිබෙනවා. ඒ අනුව, 2025 නොවැම්බර් 25 සිට 2025 දෙසැම්බර් 25 දක්වා කාලය තුළ කල් ඉකුත් වන රියදුරු බලපත්‍ර සඳහා විශේෂ සහන කාලයක් ප්‍රකාශයට පත් කර ඇත. මෙම මාසයක කාලය තුළ කල් ඉකුත් වූ රියදුරු බලපත්‍රයක් ළඟ තබාගෙන රිය පැදවීම රථවාහන නීති උල්ලංඝණය කිරීමක් ලෙස නොසලකන බව මෝටර් රථ ප්‍රවාහන කොමසාරිස්වරයා දැනුම් දී සිටී. පොලිස්පතිවරයා විසින් සියලුම පොලිස් ස්ථාන වෙත ද දැනුම් දී ඇත්තේ, මෙම සහන කාලය තුළ කල් ඉකුත් වූ බලපත්‍ර සම්බන්ධයෙන් නීතිය ක්‍රියාත්මක කිරීමේදී මෙම විශේෂ තත්ත්වය සැලකිල්ලට ගන්නා ලෙසයි. එබැවින්, අයහපත් කාලගුණයෙන් පීඩාවට පත් වී සිටින රියදුරන්ට මෙය ඉතා වැදගත් සහනයක් වනු ඇත.