හිටපු ඇමති ප්‍රසන්න රණතුංග අල්ලස් කොමිසමෙන් අත්අඩංගුවට! කප්පම් නඩුවෙන් පසු නැවතත් දැලට?

දූෂණ චෝදනාවක් සම්බන්ධයෙන් ප්‍රකාශයක් ලබා දීම සඳහා අද (12) පෙරවරුවේ අල්ලස් හෝ දූෂණ චෝදනා විමර්ශන කොමිෂන් සභාව වෙත පැමිණි අවස්ථාවේදී හිටපු අමාත්‍ය ප්‍රසන්න රණතුංග මහතා කොමිසම විසින් අත්අඩංගුවට ගෙන තිබෙනවා. වාර්තා වන ආකාරයට, ඔහු අද කොමිසම හමුවට පැමිණීමට පෙර, අත්අඩංගුවට ගැනීමේ අපේක්ෂාවෙන් අල්ලස් කොමිසමේ නිලධාරීන් සහ ආරක්ෂක අංශ කණ්ඩායමක් පසුගියදා මෙම හිටපු අමාත්‍යවරයාගේ ගම්පහ පිහිටි නිවසට ගොස් ඇති බවටද තොරතුරු වාර්තා විය. කෙසේ වෙතත්, අද ඔහු අත්අඩංගුවට පත්වූ අල්ලස් කාරණාව පිළිබඳව කොමිසම තවමත් නිල වශයෙන් පැහැදිලි කර නැහැ. ප්‍රසන්න රණතුංග මහතා මීට පෙර බස්නාහිර පළාත් ප්‍රධාන අමාත්‍යවරයා ලෙස කටයුතු කළ සමයේ, මීතොටමුල්ල ප්‍රදේශයේ ඉඩමක් ගොඩකිරීමට අදාළව ව්‍යාපාරික යුවළකට තර්ජනය කර රුපියල් මිලියන 64ක කප්පම් මුදලක් ලබා ගත් බවට චෝදනා එල්ල වුණා. එම නඩු විභාගයෙන් අනතුරුව 2022 ජූනි 06 වන දින මහාධිකරණය විසින් ඔහු වැරදිකරු කරමින්, වසර හයක අත්හිටවූ සිර දඬුවමක් සහ රුපියල් මිලියන 25ක දඩ මුදලක් නියම කරනු ලැබුවා. මහාධිකරණ තීන්දුවට එරෙහිව රණතුංග මහතා අභියාචනාධිකරණයට පෙත්සමක් ඉදිරිපත් කළද, පසුගිය 10 වන දින ඔහු එම අභියාචනය ඉල්ලා අස්කර ගැනීම කතාබහට ලක්වුණා. මෙම පෙත්සම ඉල්ලා අස්කර ගැනීම තුළින් ඔහු වරද පිළිගැනීමක් සිදුව ඇති බවට අර්ථකථනය වූ අතර, පසුව නියම වූ රුපියල් මිලියන 25ක දඩ මුදල කොටස් වශයෙන් ගෙවීම සඳහා අභියාචනාධිකරණය ඔහුට කල් ලබා දීමටද පියවර ගෙන තිබුණා. මේ සියලු සිදුවීම් මධ්‍යයේ, අද දිනයේ ඔහු නැවත වරක් අල්ලස් කොමිසමේ දැලට හසුවීම දේශපාලන ක්ෂේත්‍රයේ විශාල කතාබහකට ලක්ව තිබෙනවා.