ලංකාවේ අභිමානය රැකෙන, දළදා මාළිගාවේ නව දියවඩන නිලමේ තෝරා ගැනීමේ නිලවරණය අද!

මහනුවර ශ්‍රී දළදා මාළිගාවට නව දියවඩන නිලමේවරයෙකු තෝරා පත් කර ගැනීමේ ඓතිහාසික නිලවරණය අද (7) දින පැවැත්වීමට නියමිතයි. දිවයිනේම අවධානය දිනාගත් මෙම තේරීම, බෞද්ධ කටයුතු කොමසාරිස් ජනරාල්වරයාගේ අධීක්ෂණය යටතේ මහනුවර බෞද්ධ බලමණ්ඩල ශාලාවේදී පස්වරු 2ට ආරම්භ වීමට නියමිතයි. මේ උසස් ධුරය සඳහා මෙවර අපේක්ෂකයින් 7 දෙනෙකු ඉදිරිපත් වී සිටින අතර, වත්මන් වැඩබලන දියවඩන නිලමේ ප්‍රදීප් නිලංග දෑල මහතා සමඟ කතරගම මහා දේවාලයේ ප්‍රධාන භාරකරු දමින්ද බණ්ඩාර උඩුරාවණ, නාථ දේවාලයේ ප්‍රධාන භාරකරු ඒ.ඩබ්ලිව්.එස්. බණ්ඩාරනායක, පේරාදෙණිය විශ්වවිද්‍යාලයේ මහාචාර්ය තිලක් සුබසිංහ, විද්‍යා උපාධිධාරී ගාමිණී කළුහෙන්ඩිවල, බදුල්ලේ ප්‍රධාන භාරකරුවෙකු සහ ව්‍යාපාරිකයෙකු වන රොෂාන් ප්‍රියදර්ශන සහ විශ්‍රාමික හමුදා කර්නල් නන්ද මඩුගල්ලේ යන මහත්වරුන් තරග වැදීම විශේෂත්වයකි. මහා සංඝරත්නය ඇතුළු 263 දෙනෙකුට ඡන්දය ප්‍රකාශ කිරීමට සුදුසුකම් ලැබී ඇති අතර, පත්වන නව නිලමේවරයාට වසර 10ක කාලයක්, එනම් 2035 දක්වා සේවය කිරීමට අවස්ථාව හිමිවනු ඇත. දියවඩන නිලමේ ධුරය සඳහා සිංහල බෞද්ධ, වයස අවුරුදු 18ත් 70ත් අතර, අධිකරණයෙන් වරදකරුවෙකු නොවූ අයෙකු විය යුතු බව බෞද්ධ කටයුතු දෙපාර්තමේන්තුව පවසයි.