ඇමතිවරුන්ගේ ක්‍රිප්ටෝ ආයෝජන ගැන මහ බැංකුවෙන් හදිසි තීරණයක්!

ශ්‍රී ලංකාවේ දේශපාලන ක්ෂේත්‍රයේ පමණක් නොව, සාමාන්‍ය ජනතාව අතරත් පසුගිය කාලය පුරාවටම විශාල කතාබහක් ඇති කළ ‘ක්‍රිප්ටෝ මුදල්’ සම්බන්ධයෙන් මේ වන විට ශ්‍රී ලංකා මහ බැංකුවෙන් වැදගත් පියවරක් ගෙන තිබෙනවා. රජයේ අමාත්‍යවරුන් කිහිප දෙනෙකුම තමන්ට ක්‍රිප්ටෝ මුදල් ආයෝජන ඇති බවට සිය වත්කම් ප්‍රකාශ මගින් හෙළිදරව් කිරීමත් සමඟ, මේ සම්බන්ධයෙන් නීතිමය රාමුවක් නොමැතිවීම ප්‍රබල ගැටලුවක් බවට පත් වුණා. මේ තත්ත්වය හමුවේ, ශ්‍රී ලංකා මහ බැංකුව විසින් රජයට විශේෂ යෝජනාවක් ඉදිරිපත් කර ඇත්තේ, ක්‍රිප්ටෝ මුදල් භාවිතය සහ නියාමනය පිළිබඳව අනාගතයේදී අනුගමනය කළ යුතු ක්‍රියාමාර්ග සම්බන්ධයෙන් ප්‍රතිපත්තිමය තීන්දු ගැනීමට ඉහළ පෙළේ කමිටුවක් පත් කරන ලෙසයි. මුදල් අමාත්‍යාංශය වෙත යොමු කර ඇති මෙම යෝජනාවට රජයේ පාර්ශ්වයෙන් ද යහපත් ප්‍රතිචාරයක් ලැබී ඇති බවටයි වාර්තා වන්නේ. මෙම නව කමිටුවේ ප්‍රධාන අරමුණ වන්නේ, ක්‍රිප්ටෝ මුදල් සම්බන්ධයෙන් ශ්‍රී ලංකාව ඉදිරියට කටයුතු කළ යුත්තේ කෙසේද යන්න පිළිබඳව ප්‍රතිපත්තිමය තීරණ ගැනීම සඳහා අවශ්‍ය නිර්දේශ ඉදිරිපත් කිරීමයි. මහ බැංකු අධිපති ආචාර්ය නන්දලාල් වීරසිංහ මහතා ද මීට පෙර අවධාරණය කළේ, ක්‍රිප්ටෝ මුදල් සම්බන්ධයෙන් මෙරට තුළ දැනට කිසිදු නීතියක් නොමැති බවයි. මේ තත්ත්වය මත, මෙම නව කමිටුවේ තීරණ ශ්‍රී ලංකාවේ ඩිජිටල් මුදල් ක්ෂේත්‍රයේ අනාගතය තීරණය කරනු ඇති බවටයි බොහෝ දෙනාගේ අදහස.