තංගල්ල, සීනිමෝදර ප්රදේශයේ නිවසකින් වාර්තා වූ අභිරහස් මරණ ත්රිත්වයක් මුළු රටම කම්පනයට පත් කළ සිදුවීමක් බවට පත් වී තිබෙනවා. මුලින් බොහෝ දෙනා සිතුවේ තාප්පයක් ඉදිකරමින් සිටි අහිංසක කම්කරුවන් පිරිසක් මෙලෙස මියගොස් ඇති බවයි. නමුත් පොලිස් විමර්ශනවලින් අනාවරණය වී ඇත්තේ මියගිය තිදෙනාම මෙම දැවැන්ත මත්ද්රව්ය ජාවාරමට සෘජුවම සම්බන්ධව සිටි බවයි.මෙම ඛේදනීය සිදුවීමට පොලිසිය සම්බන්ධ වන්නේද අහම්බෙන්. මුලින් රෝහල්ගත කර පසුව මියගිය පුද්ගලයාගේ පුතුන් දෙදෙනා, නිවසේ නවතා තිබූ ලොරියක් ඉවත් කිරීමට පැමිණි අවස්ථාවේ ගම්මුන් සමඟ ඇතිවූ බහින්බස්වීමක් දුරදිග ගොස් ගැටුමක් දක්වා වර්ධනය වී තිබෙනවා. පහරකෑමට ලක්වූ පුතුන් දෙදෙනා පොලිසියට පැමිණිලි කිරීමත් සමඟයි, මේ මහා පරිමාණ ජාවාරමේ අඳුරු පැත්ත එළියට එන්න පටන් ගත්තේ.පොලිස් අත්අඩංගුවට ගත් පුතුන් දෙදෙනා ඇතුළු සැකකරුවන් හය දෙනෙකු මේ වනවිට පොලිස් භාරයේ පසුවනවා. තංගල්ල මහේස්ත්රාත් අධිකරණයට ඉදිරිපත් කිරීමට නියමිත ඔවුන්ගෙන් තවත් තොරතුරු හෙළිවනු ඇතැයි අපේක්ෂා කෙරේ.මියගිය තිදෙනාගේ මරණ පිළිබඳ ලද තොරතුරක් මත පොලීසිය එම නිවස පරීක්ෂා කිරීමේදී, එහි නවතා තිබූ ලොරි රථ දෙකක සහ කදුරුපොකුණ ප්රදේශයේ ගරාජයක තිබී තවත් ලොරි රථයක් සොයාගෙන තිබෙනවා. මෙම ලොරි රථ තුනේ රහසිගතව සකස්කළ කුටිවල සඟවා තිබූ අයිස් කිලෝග්රෑම් 420.976ක් සහ හෙරොයින් කිලෝග්රෑම් 284.94ක් ඇතුළු කිලෝග්රෑම් 705.91ක් බරැති, රුපියල් මිලියන 9,888ක් (කෝටි 988) වටිනා මත්ද්රව්ය තොගයක් පොලිසිය විසින් සොයාගෙන තිබීම සැබවින්ම කම්පනයට කරුණක්.එපමණක් නොව, එක් ලොරි රථයක පැණි කොමඩු තොගයක් අතර සඟවා තිබූ ටී-56 ගිනි අවියක් සහ නවීන පන්නයේ රිවෝල්වර පහක් ද පොලිස් භාරයට ගෙන තිබෙනවා. මෙම දැවැන්ත මත්ද්රව්ය ජාවාරම විදේශයක සිටින “උණාකූරුවේ ශාන්ත” නමැත්තා විසින් මෙහෙයවනු ලබන්නක් බවට පොලිස් විමර්ශනවලදී හෙළිවී ඇත.අභිරහස් ලෙස මියගොස් ඇත්තේ තංගල්ල, උණාකූරුව ප්රදේශයේ පදිංචි සුවඳ හැන්නදිගේ තුසිත් වෙනුර කුමාර (50) සහ අම්බලන්තොට, ලුණුම ප්රදේශයේ පදිංචිව සිටි ඩබ්ලිව්.ඊ. කවිඳු කල්හාර සහ දිනුක ලක්ෂාන් හේවාවිතාරණ යන තිදෙනායි. රෝහල්ගත කිරීමෙන් පසු මියගිය තුසිත් වෙනුර කුමාර, “උණාකූරුවේ ශාන්ත” ගේ මෙරට මත්ද්රව්ය ජාලය මෙහෙයවූ ප්රධානියා බවට පොලීසිය හඳුනාගෙන ඇති අතර, සීනිමෝදර නිවස අසල තිබී සොයාගත් එක් ලොරි රථයක් ඔහුට අයත් එකක් බවටද තහවුරු වී තිබෙනවා.ඔහුගේ මරණයට හේතුව ලෙස මුලින් ගෑස්ට්රයිටීස් රෝගී තත්ත්වයක් සඳහන් වුවත්, පශ්චාත් මරණ පරීක්ෂණවලින් සැබෑ හේතුව හෙළිවනු ඇත. තංගල්ල පොලීසිය සහ පොලිස් මත්ද්රව්ය නාශක කාර්යාංශය එක්ව සිද්ධිය පිළිබඳව වැඩිදුර විමර්ශන මෙහෙයවන අතර, මේ මහා පරිමාණ ජාවාරමේ තවත් තොරතුරු නුදුරේදීම හෙළිවනු ඇතැයි අපේක්ෂා කෙරේ.
