මොළය කන භයානක ඇමීබා කේරළයම බිය ගන්වයි: මරණ සංඛ්‍යාව දෙගුණ වෙයි!

ඉන්දියාවේ කේරළ ප්‍රාන්තයෙන් වාර්තා වන භයානක පුවතක් මේ දිනවල ලෝකයේ අවධානය දිනාගෙන තිබෙනවා. ඒ ‘මොළය කන ඇමීබා’ ලෙසින් හැඳින්වෙන දුර්ලභ, ජලයෙන් බෝවන සුවිශේෂී ඇමීබා වර්ගයක් හේතුවෙන්. Naegleria fowleri නම් වන මෙම ක්ෂුද්‍ර ජීවියා මොළයට ඇතුළු වුවහොත්, මොළයේ පටක විනාශ කරමින් ඉතාමත් මාරාන්තික ආසාදනයක් ඇති කිරීමට සමත්. පසුගිය වසරට සාපේක්ෂව මේ වසරේ කේරළයේ ආසාදිතයන් සහ මරණ සංඛ්‍යාව දෙගුණයකටත් වඩා වැඩි වී ඇති බවයි වාර්තා වන්නේ. මේ මාසයේ පමණක් මරණ නවයක් සිදුව ඇති අතර, මේ වන විට මුළු මරණ සංඛ්‍යාව 19ක් දක්වා ඉහළ ගොස් තිබෙනවා. අවාසනාවන්ත ලෙස මාස තුනක් වයසැති බිළිඳෙකුගේ මරණයක්ද මේ අතරට ඇතුළත්. මෙම ඇමීබා සාමාන්‍යයෙන් උණුසුම් විල් සහ ගංගාවල වර්ධනය වන අතර, දූෂිත ජලය නාසය හරහා ශරීරයට ඇතුළු වීමෙන් ආසාදනය සිදු වන බව සෞඛ්‍ය බලධාරීන් පවසනවා. මෙය පුද්ගලයාගෙන් පුද්ගලයාට පැතිරෙන්නේ නැති බවට සහනයක් තිබුණත්, මොළයට ඇතුළු වුවහොත් 95%කට වඩා වැඩි අවස්ථාවලදී මරණය ගෙන දෙන බවටයි ලෝක සෞඛ්‍ය සංවිධානය සහ ඇමරිකානු රෝග පාලන මධ්‍යස්ථාන අනතුරු අඟවන්නේ. හිසරදය, උණ, වමනය වැනි මූලික රෝග ලක්ෂණ ඉක්මනින්ම වලිප්පුව, සිහිකල්පනාව වෙනස් වීම සහ කෝමා තත්ත්වයන් දක්වා වර්ධනය විය හැකි බවද ඔවුන් පෙන්වා දෙනවා. 1962 සිට ලොව පුරා මෙවැනි රෝගීන් 500කට ආසන්න සංඛ්‍යාවක් වාර්තා වී ඇති අතර, ඉන්දියාව, ඇමරිකාව, පාකිස්තානය සහ ඕස්ට්‍රේලියාව වැනි රටවලින් වැඩි වශයෙන් මෙම මාරාන්තික ඇමීබා හේතුවෙන් සිදුවූ ආසාදන සහ මරණ වාර්තා වී තිබෙනවා.