රෝගීන් රැගෙන ගිය ගිලන් රථය තුළින් බියර් කෑන්! රියදුරුට මොකද වුණේ?

ගිලන් රථයක් කියන නම ඇසුණු විගස අපේ මතකයට එන්නේ ජීවිත බේරාගන්නා වීරයන්. ඒත්, මේ කියන්න යන්නේ ඒ වීරත්වය බිඳ දමමින්, රෝගී ජීවිත පවා අනතුරේ හෙළමින්, සිය රාජකාරී වේලාවේදී නොමනා ක්‍රියාවක නිරත වූ රියදුරෙකු පිළිබඳවයි. දෙණියාය ප්‍රදේශයෙන් වාර්තා වන මේ සිදුවීම බොහෝ දෙනෙකු කම්පනයට පත් කර තිබෙනවා. දෙණියාය මූලික රෝහලට අයත් ගිලන් රථයක්, රෝගීන් දෙදෙනෙකු මාතර මහ රෝහල වෙත රැගෙන යමින් සිටියදී මොරවක අතුඇල ප්‍රදේශයේදී මාර්ගයෙන් ඉවතට පැන නිවසක ගේට්ටුවක වැදී අනතුරට ලක්ව තිබෙනවා. සිද්ධියට පසුව ගිලන් රථය පරීක්ෂා කිරීමේදී එහි ඉදිරිපසින් බියර් කෑන් දෙකක් සොයා ගැනීමට මොරවක පොලීසිය සමත් වී ඇත. අනතුර සිදුවූ වහාම රියදුරු එම ස්ථානයෙන් පළා ගොස් ඇති අතර, පසුව පොලීසියට භාර වී තිබෙනවා. රියදුරා බීමතින් සිටියේද යන්න තහවුරු කර ගැනීම සඳහා මාතර මහ රෝහලේ අධිකරණ වෛද්‍යවරයකු වෙත යොමු කිරීමට නියමිත බව පොලීසිය වැඩිදුරටත් ප්‍රකාශ කර තිබෙනවා. වාසනාවකට මෙන්, අනතුරට පත් රෝගීන් දෙදෙනාට කිසිදු හානියක් සිදුවී නොමැති අතර, ඔවුන්ව වහාම වෙනත් ගිලන් රථයකින් මාතර රෝහල වෙත යැවීමට සෞඛ්‍ය අංශ සහ පොලීසිය කටයුතු කර තිබෙනවා. මේ ආකාරයේ නොමනා ක්‍රියාවන් රෝගීන්ගේ ජීවිත කෙරෙහි කොතරම් බලපෑමක් ඇති කළ හැකිද යන්න මෙම සිදුවීමෙන් නැවත වරක් සිහිපත් කරවනවා.