බොලිවුඩයේ සුන්දරම යුවළක් වන අයිශ්වර්යා රායි බච්චන් සහ අභිෂේක් බච්චන් වෙන්වීමේ කටකතා දිගින් දිගටම පැතිර ගියා. නමුත් මේ කටකතාවල කිසිදු සත්‍යතාවයක් නොමැති බව ප්‍රසිද්ධ දැන්වීම් අධ්‍යක්ෂක ප්‍රහ්ලාද් කක්කාර් මහතා හෙළි කර තිබෙනවා. අයිශ්වර්යාගේ මව පදිංචිව සිටින ගොඩනැගිල්ලේම ජීවත් වන කක්කාර් මහතා, අයිශ්වර්යා ඇගේ මව බැලීමට නිතර යන බවත්, ඊට හේතුව ඇගේ මවගේ අසනීප තත්වය බවත් සඳහන් කළා. ඔහු පවසන ආකාරයට, අයිශ්වර්යා දියණිය ආරධ්‍යා පාසලට ඇරලවා, නැවත ඇයව රැගෙන ඒමට පෙර පැය තුන හතරක් තම මව සමග ගත කරනවා. “ඇය විවාහයෙන් පලා ගොස් මව සමග ජීවත් වනවා යැයි හැමෝම කියනවා. නමුත් ඇය තම දියණිය පාසලේ සිටින උදෑසන කාලයේ පමණයි මව බැලීමට යන්නේ. සමහර දිනවල අභිෂේක් පවා ඇය සමඟ එනවා. එසේ නම්, ඇය ඔහුගෙන් පලා යනවා නම් ඔහු එන්නේ ඇයි?” කක්කාර් මහතා ප්‍රශ්න කරනවා. මේ අනුව, ජයා බච්චන් සහ ශ්වේතා බච්චන් සමඟ ඇති වී තිබෙන බවට පැවසෙන ගැටුම්ද හුදු කටකතා පමණක් බවටයි ඔහු පෙන්වා දෙන්නේ.
