iPhone 17 ගන්න හිටපු ඔයාටත් මේ ප්‍රශ්නේ එයිද? Apple එකේ අලුත්ම අර්බුදය!

ලොව පුරා Apple රසිකයන් නොඉවසිල්ලෙන් බලා සිටි iPhone 17 Series සහ iPhone Air දුරකථන මාදිලි පසුගිය සතියේදී ‘Awe Dropping’ නමින් හැඳින්වූ විශේෂ උත්සවයකදී එළිදැක්වුණා. සැප්තැම්බර් 12 වැනිදා සිට පෙර ඇණවුම් සඳහා විවෘත වූ මේ අලුත්ම දුරකථන සැප්තැම්බර් 19 වනදා සිට බෙදාහැරීමට නියමිතව තිබුණත්, සියල්ලන්ටම එක දිනයකදී ඒවා අතට පත් නොවනු ඇති බවට දැන් තොරතුරු වාර්තා වෙනවා. Apple වෙබ් අඩවියේ පවා බෙදාහැරීමේ කාලසීමාවන් කල් ගොස් ඇති බවත්, ඉන්දියාවේ සිල්ලර වෙළෙන්දන් පවා දැඩි තොග හිඟයකට මුහුණ දී ඇති බවත් සඳහන්. මේ තත්ත්වය iPhone 17 Series සහ iPhone Air දුරකථන වලට ඇති දැඩි ඉල්ලුම නිසා ඇති වූවක් බවට මුලින් අනුමාන කළත්, Moneycontrol වාර්තාවකට අනුව, ඉන්දියාවේ Apple සමාගමේ සිල්ලර වෙළඳ ජාලය පුළුල් වීම නිසා එක් එක් වෙළඳසැලට ලැබෙන iPhone 17 Pro සහ iPhone 17 Pro Max සංඛ්‍යාව අඩු වීම මේ හිඟයට ප්‍රධාන හේතුවක් බවට පත්වෙලා. මුලින්ම නිෂ්පාදනය කරන්නේ සාමාන්‍ය මාදිලි වන අතර, Pro සහ Pro Max මාදිලි වල නිෂ්පාදන ධාරිතාව වැඩි වන්නේ මාස කිහිපයකට පසුව බවත් වාර්තා වෙනවා. දැන් තියෙන තත්ත්වය තමයි, දුරකථන 500ක් වැනි තොගයකින් Pro මාදිලි 50ක් පමණක් ලැබෙන අතර, Pro Max මාදිලි ලැබෙන්නේ 10ක් වැනි ඉතා අඩු සංඛ්‍යාවක්. විශේෂයෙන්ම 512GB සහ 1TB වැනි ඉහළ ධාරිතාවන් සහිත දුරකථන සොයාගැනීම ඉතාම අපහසු බවටයි තොරතුරු වාර්තා වෙන්නේ. ඒ නිසා, iPhone 17 Pro හෝ Pro Max එකක් ගන්න බලාගෙන හිටපු අයට Apple එකේ ඔන්ලයින් වෙළඳසැලට හෝ ඔවුන්ගේම වෙළඳ නාලිකා වලට යොමු වෙන්න සිද්ධ වෙයි. ඒත්, එහෙම කළත්, බෙදාහැරීම් ප්‍රමාද වීමේ අවදානමක් තවමත් තියෙනවා. මේ තත්ත්වය ශ්‍රී ලංකාවටත් බලපාන්න පුළුවන් බවටයි ආරංචි.